زهره صبا د کابل د پولي تخنیک پوهنتون د کیمیاوي ټکنالوژۍ برخې په درېیم کال کې محصله وه، چې طالبانو د نجونو پرمخ پوهنتونونه وتړل.
زهره اوس هره ورځ د جامو جوړولو دې اکاډمۍ ته راځي.
وايي ۵ میاشتې کېږي چې ښځینه جامې جوړوي او پلوري یې.
دلته نجونې او ښځې د خیاطۍ ترڅنګ خطاطي او رسامي هم زده کوي.
![](https://amu.tv/wp-content/uploads/2023/08/vlcsnap-2023-08-10-18h28m55s796-1024x576.jpg)
هغه چا چې دا اکاډمي یې جوړه کړې ده وايي، موخه یې د ښځو پیاوړي کول دي.
د خیاطۍ استاده زهرا احمدي وايي: «پنځه میاشتې کېږي چې ما په دې کاډمۍ کې دا هنر زده کړی او یوه میاشت کېږي چې په رضاکاره توګه نورو ته دا کار ورزده کوم.»
د خیاطۍ یوه بله روزونکې سکینه جعفري بیا وایي: «زه په پوهنتون کې د ارواپوهنې په برخه کې په زده کړو بوخته وم، خو له بده مرغه محدودیتونو په کور کېنولم او روحیه مې له لاسه ورکړې وه خو له نېکه مرغه اوس د جامو جوړولو په دې روزنیز مرکز کې فعالیت لرم.»
په دې اکاډمۍ کې تر لسو زیاتې ښځې افغانۍ جامې جوړوي او په خپلو پېردونکو یې پلوري.
![](https://amu.tv/wp-content/uploads/2023/08/Screenshot_20230810_202217_Drive-01-1024x576.jpeg)
نږدې اته میاشتې مخکې طالبانو د نجونو او ښځو پرمخ ټول ښوونیز مرکزونه وتړل. له هغې څلور ورځې وروسته، طالبانو په غیردولتي بنسټونو کې د ښځو کار هم منع اعلان کړ.
له دې سره هممهاله تر ۶۸۹ زیاتې ورځې کېږي چې طالبانو له شپږم ټولګي پورته نجونو پرمخ د ښوونځیو دروازې تړلې دي.
دا ټول محدودیتونه د دې لامل شوي، چې ولایتونو کې یو شمېر نجونې او ښځې کوچنیو سوداګریو او د خیاطۍ زدهکولو ته مخه کړي.