ملګرو ملتونو اعلان کړی چې د نورستان ولایت په ویجاړونکو سېلابونو کې د مړو شویو کسانو شمېر له ۴۰ تنو اوښتی دی. د دغه سازمان په وینا، لسګونه کسان ټپیان شوي او ډېری نور لا هم نادرکه دي.
ورته مهال د قربانیانو یو شمېر پاتې کسان وایي چې لا هم د خپلو لادرکه شویو ژوندیو او مړیو په لټون پسې دي او بيړنیو مرستو ته سخته اړتیا لري.
بلخوا له طبیعي پېښو سره د طالبانو د مبارزې اداره وایي چې په نورستان کې د تلفاتو شمېر په دوامداره توګه د زیاتېدو په حال کې دی.
په نورستان کې له راغلیو خونړیو سېلابونو د دوو ورځو په تېرېدو سره لا هم د لټون او ژغورنې عملیات دوام لري او یو شمېر کسان تر خاورو او خټو لاندې ایسار دي.
د سیمې یو زیانمن شوی اوسېدونکی ولیمحمد چې پر مالي زیان سربېره یې خپل ماشوم له لاسه ورکړی او خپله هم سخت ټپي شوی، وایي چې سېلاب د هغوی ټوله دارايي له ځان سره وړې ده.
د ملګرو ملتونو د سرمنشي ویاند سټیفن دوجاریک په خپلو څرګندونو کې وویل: «زیاتېدونکي سېلابونه، د لارو ویجاړېدل او د ځمکنۍ لارې ستونزې د دې لامل شوي چې د مرستو رسولو لړۍ له جدي خنډونو سره مخ شي.»
هغه زیاته کړه چې تر ۴۰ زیات کسان مړه، لسګونه ټپیان او ډېر نور نادرکه دي او د دوی ناورین ته د رسېدو او لټون هڅې لا هم روانې دي.
د نورستان په مرکز پارون کې سېلابونو گڼې کورنۍ د ویر پر ټغر کېنولي دي.
له طبیعي پېښو سره د مبارزې ادارې مرستیال ویاند تاج محمد همت وویل چې په بېلابېلو ولایتونو کې د سېلابونو او شدیدو بارانونو خطر شته او خلک باید د سېلابونو له لارو لېرې شي.
دغه راز د چاپیریال ساتنې ادارې نړیوال اقلیمي بدلونونه په هېواد کې د ناڅاپي طبیعي آفتونو عمده لامل بللی دی.
