د کابل یو شمېر اوسېدونکي وايي، د پلازمېنې په بازارونو کې د زړو بانکنوټونه ډېر شوي او د پېرېدونکو او پلورونکو ترمنځ یې جنجالونه رامنځته کړي دي.
له بلې خوا د طالبانو تر ادارې لاندې مرکزي بانک پر اېکس ټولنيزه شبکه له خلکو غوښتي چې خپل پېر او پلور د «اېف پي» کارډ له لارې وکړي، څو د دوی پیسې زړې نه شي.
محمد علي چې له ډېرې مودې راهيسې په کابل ښار کې هټۍ لري او له همدې لارې د خپلې کورنۍ لګښتونه پوره کوي، وايي چې د بانکنوټونو ډېر زړېدل په ځانګړې توګه له لسګون او سلګون يې کار ستونزمن کړى او تل د زړو پیسو له امله د پېرودونکو سره په جتجال کې وي.
هټیوال محمد علي وايي: «موږ شاوخوا پنځه زره یا پنځه نیم زره زړې پیسې لرو، کله چې یو پېرودونکی د اخیستلو لپاره راشي او زړې پیسې ورکړو، دوی نه راضي کیږي. همدا لامل دی چې زموږ په هېواد کې د نويو پیسو نشتوالي ستونزې نورې هم ډېرې کړې دي.»
د هېواد یو شمېر اوسېدونکي پر طالبانو په ځانګړي ډول د طالبانو تر ادارې لاندې مرکزي بانک نیوکه کوي او وايي چې له بازاره د زړو بانکنوټونو په راټولولو کې بې غوري کوي.
يو شمېر هېوادوال وايي، چې د زړو بانکنوټونو د شتون له امله په ورځني پېر او پلور کې له جدي ستونزو سره مخ دي.
د کابل اوسېدونکی نوروز علي امیري وايي:«له بده مرغه په افغانستان کې کله چې پیسې په لاسونو کې نیسو، دا احساس نه کوو چې ارزښتمنې پیسې مو په لاس کې نیولې دي. موږ داسې احساس کوو چې موږ د ټیټ ارزته پيسې لرو.د یوه بې ارزښته کاغذ مو لاس کې نيولى. له همدې امله، موږ له ډیرو ننګونو سره مخ یو او هیڅوک دا زړې پیسې نه اخلي {او دوی وايي} دا خرابې شوې یا څېرې شوې دي.»
د کابل یو بل اوسېدونکی وايي:«د دغو پیسو حقیقت تر ډېره له ستونزو ډک دی او موږ له سرپرست حکومت (طالبانو) څخه غوښتنه کوو، چې دغه خرابې شوې او زړې پیسې راټولې کړي او د خلکو ستونزې ژر تر ژره حل کړي، ځکه زموږ د ستونزو یوه برخه ده. خلک دې زړو پیسو ته په ارزښت قايل نه دي او هیڅوک دا زړې پیسې نه اخلي.»
د طالبانو تر واک لاندې مرکزي بانک په روانه میاشت کې اعلان وکړ چې د راکړې ورکړې د اسانتیا په موخه له ۸۴۰ میلیونو څخه زیات افغانيو په ارزښت زاړه بانکنوټونه سوځول شوي دي. خو د بدلولو او د نويو بانکنوټونو د وېش په اړه يې څه نه دي ويلي.
د ۱۴۰۱ هجري لمریز کال د لړم په میاشت کې د مرکزي بانک د عالي شورا غړي شاه محمد محرابي چې په امریکا کې مېشت دی، ويلي و چې ۳۹۰ میلیونه بانکنوټونه چې معادل یې لس ملیارده افغانۍ کېږي،د فرانسوي شرکت اوبرتور فيدروشيري نومېږي، چاپ شوي دي.
