د دوشنبې په ورځ د غزي په مرکزي برخه کې د بې ځایه شویو فلسطینیانو د یوه ښوونځي تر څنګ د اسرائیلو په هوايي برید کې لږ تر لږه ۱۰ کسان ووژل شول او ګڼ نور ټپیان شول.
دا خونړۍ پېښه په داسې حال کې رامنځته کېږي چې د امریکا په ملاتړ د غزي نازک اوربند لا دمخه له سختو ننګونو او سرغړونو سره مخ دی.
عیني شاهدانو او ډاکټرانو ویلي چې تر هوايي برید وړاندې، د سیمې اوسېدونکو له هغې ملیشې سره نښته کړې وه چې د اسرائیلو ملاتړ ورسره و او هڅه یې کوله له ښوونځي څخه یو شمېر کسان وتښتوي.
د دغې نښتې په جریان کې، اسراییلي بې پیلوټه الوتکو پر سیمه دوه توغندي وویشتل چې د ډېری بې ځایه شویو فلسطینیانو ژوند یې واخیست.
ورته مهال، په غزه ښار کې د موټرسایکل سپرو په یو بل برید کې یو فلسطینی ووژل شو او یو ماشوم سخت ټپی شو.
همدارنګه د غزي په مرکز کې پر یوه بل موټر د ډزو له امله یو بل کس هم ژوند له لاسه ورکړ، چې په دې سره د دوشنبې په ورځ د مړو ټول شمېر لږ تر لږه ۱۲ کسانو ته ورسېد.
اسراییلي پوځ تر اوسه د دغو درېیو واړو پېښو په اړه څه نه دي ویلي، خو د اسرائیلو ملاتړې ملیشې ادعا کړې چې په نښته کې یې د حماس ۵ غړي وژلي دي، هغه ادعا چې حماس رد کړې او دا ډلې یې د اسرائیلو «جاسوسان» بللي دي.
دا تاوتریخوالی په داسې حال کې زیاتېږي چې د وسلو پر سر د حماس او اسرائیلو ترمنځ اختلافات د ډونالډ ټرمپ د سولې پلان په وړاندې لوی خنډ ګرځېدلي دي.
حماس ټینګار کوي چې تر هغه چې اسراییل د سولې د پلان لومړۍ مرحله په بشپړ ډول پلې نه کړي، دوی به خپله وسله کېنږدي.
د غزي د روغتیا وزارت د معلوماتو له مخې، د تېر اکتوبر له میاشتې راهیسې چې اوربند اعلان شوی، د اسرائیلو په ډزو نږدې ۷۰۰ کسان وژل شوي دي.
دا جګړه چې د ۲۰۲۳ کال د اکتوبر له ۷مې پیل شوې، تر اوسه پکې له ۷۲ زره ډېر فلسطینیان وژل شوي او د غزې لویه برخه یې په کنډوالو بدله کړې ده.
