له بلخ ولایت څخه ځایي سرچینې آمو ته ویلي، چې د طالبانو سیمهییزو چارواکو د مزارشریف ښار اوسېدونکو ته امر کړی چې د خپلو کورونو پر دروازو امنیتي څارونکی کامرې ولګوي.
خو د مزارشریف ښار یو شمېر اوسېدونکي وایي، چې دوی د فقر او پراخې بېکارۍ له وضعیت سره مخ دي او ډېرې کورنۍ د دې کامرو د اخیستو مالي توان نه لري.
سرچینې زیاتوي، د دغو کامرو د نصب او فعالولو لګښت له ۵ زره څخه تر ۱۰ زره افغانیو پورې رسېږي، حال دا چې خلک له سختو اقتصادي ستونزو سره لاس او ګریوان دي.
سرچینو دا هم ویلي، چې د طالبانو سیمهییزو چارواکو خلک ګواښلي، که دا امنیتي کامرې نصب نهکړي، د کورونو برېښنا به یې پرې شي، او پر دې سربېره به له قانوني سزا سره هم مخ شي.
د طالبانو له لوري په دې اړه تر اوسه کوم رسمي څرګندونې نه دي شوي.
د طالبانو د دغه حکم له مخې، د استوګنې د کورونو مالکان باید له بازاره په خپل لګښت کامرې وپېري او د نصب مصارف یې هم پخپله ورکړي.
