د طالبانو تر ادارې لاندې د صنعت او سوداګرۍ وزارت په یوه خبرپاڼه کې ویلي، چې د طالبانو سوداګرۍ وزیر، نورالدین عزیزی، د یوه پلاوي په مشرۍ د چهارشنبې په ورځ په «آستانې نړیوال مجمع» غونډه کې د ګډون په موخه قزاقستان ته تللی دی.
په خبرپاڼه کې ویل شوي چې د طالبانو د سوداګرۍ وزیر به په دې غونډه کې د افغانستان د «فرصتونو او اقتصادي ودې» په اړه وینا وکړي.
همدا راز، په دې سفر کې د عامه چارو وزارت د اورګاډي مرستیال وزیر، محمداسحاق صاحبزاده، د طالبانو تر ادارې لاندې د دولتي شرکتونو د مشرتابه پلاوي مشر دی، او احمدجان بلال، نورالدین عزیزی سره مل دي.
«آستانې نړیوال مجمع» د دوو ورځو (د می ۲۹ او ۳۰) لپاره جوړ شوی، چې پکې به د نړیوال اقتصاد، اقلیم بدلون، نړیوال امنیت، دوامداره پراختیا، او سیمهییزو همکاریو په اړه خبرې وشي.
په دې غونډه کې د مختلفو هېوادونو مشران، د نړیوالو سازمانونو استازي او پوهان ګډون کوي، او ټاکل شوې چې د افغانستان لپاره د ملګرو ملتونو د یوناما مشره، روزا اتونبایوا، هم د ملګرو ملتونو د پلاوي په مشرۍ ګډون وکړي.
طالبان چارواکو دا سفر قزاقستان ته په داسې حال کې کړی چې ځینې یې د ملګرو ملتونو په تور لست کې شامل دي.
د ملګرو ملتونو امنیت شورا تر اوسه د طالبانو د دې پلاوي د سفر د بندیز معافیت په اړه څه نه دي ویلي، خو مخکې یې د امیرخان متقي د چین سفر ته د یوه اوونۍ لپاره معافیت ورکړی و.
