په کندهار کې د طالبانو تر ادارې لاندې د اطلاعاتو او کلتور ریاست وايي، سږ کال له دغه ولایت څخه ۶زره ۱۵ ټنه انار له افغانستان څخه بهر ته صادر شوي دي.
دغه رياست د يوې خبرپاڼې په خپرولو سره ويلي، چې د دغه صادراتو ټوليز ارزښت درې ميليونه او ٨٦٨ زره امريکايي ډالرو ته رسېږي.
د دې خبرپاڼې په وينا، د کندهار انار متحده عربي اماراتو، هند، برېټانيا، قرغزستان، لبنان او پاکستان ته صادر شوي دي.
دا په داسې حال کې ده، چې د هېواد یو شمېر سوداګر وايي چې د صادراتو په برخه کې له ګڼو ستونزو سره مخ دي.
دغو سوداګرو د کافي سړو خونو نشتوالى، د ګمرکي تعرفو لوړوالى، د ويزو په ترلاسه کولو کې ستونزې او د نړيوالو بنديزونو له امله محدوديتونه چې د بانکونو له لارې يې د پيسو لېږد ستونزمن کړى، د خپلو عمده ستونزو په توګه يادوي.
