د لیبیا په ختیځ کې چارواکو ویلي چې ددې هېواد په ختیځ درنا ښار کې یې څه د پاسه زر مړي له خاورې او خټو ایستلي دي. ښايي د تلفاتو شمېر زیات شي.
ددغه هېواد په ختیځ کې دولتي چارواکي وايي، چې ددغو سېلابونو له امله تر اوسه ۲ زره او ۸۰۰ تنه مړه او له ۶ زرو زیات بېدرکه شوي دي. خو تراوسه وروستي تلفات نه دي روښانه شوي.
هغه تصویرونه چې د سېلابونو له راتلو وروسته ددغه هېواد له بېلابېلو برخو خپره شوي پکې ښودل شوي ګڼ شمېر موټر چپه شوي، واټونه تخریب او کورونه هم زیانمن شوي دي.
![](https://amu.tv/wp-content/uploads/2023/09/62727527-01.jpeg)
دا په داسې حال کې دي چې په سیمه کې د سرې میاشتې ټولنې رییس د دوشنبې په ورځ په دغه ښار کې له ۱۵۰ تر ۲۵۰ تنو د مړینې خبر ورکړی و.
د ښار ځینې برخې له اوسېدونکو سره یو ځای د سېلابونو له امله سیند لاندې کړې او له منځه تللې دي.
![](https://amu.tv/wp-content/uploads/2023/09/62727530-01.jpeg)
له بلې خوا، یو شمېر رسنیو هم رپوټ ورکړی چې په دې هېواد کې د توپان او سېلابونو له امله تر دوه زره او ۸۰۰ تنه مړه شوي دي.
لیبیا له سیاسي پلوه د ختیځ او لوېدیځ ترمنځ وېشل شوی او په ۲۰۱۱ کال کې چې د ناټو په ملاتړ د ولسي پاڅون له امله جګړه رامنځته شوه عمومي خدمات له منځه تللي دي.
په طرابلس کې د نړیوالې ټولنې له خوا په رسمیت پېژندل شوی دولت ختیځه برخه نه اداره کوي.