د کاناډا لومړي وزیر جسټین ټروډو د امریکا د ٢٠٢٤ کال د ټاکنو له کمپاینونو د وتلو په اړه د جو بایډن د پرېکړې هرکلی وکړ.
هغه پر اېکس لیکلي، چې هغه د اوسني ولسمشر او لومړۍ میرمن څخه «مننه» کوي.
ښاغلي ټروډو ليکلي«زه ولسمشر بایډن د کلونو راهیسې پیژنم، هغه یو ستر سړی دی او هر څه چې کوي د خپل هیواد سره د مینې پر بنسټ دي. د ولسمشر په توګه، هغه د کاناډایانو شريک او ریښتینی ملګری دی.»
دا په داسې حال کې ده، چې جو بایډن پرون ( یکشنبه، چنګاښ ٣١مه) د ۲۰۲۴ کال له ټاکنیز کمپاینونو څخه د وتلو اعلان وکړ.
هغه د امریکا خلکو ته لیکلي « د ولسمشر په توګه ستاسو خدمت کول زما د ژوند ترټولو لوی ویاړ دی. په داسې حال کې چې ما د بیا ټاکل کېدو اراده درلوده، خو زه باور لرم چې زما د ګوند او هېواد په ګټه ده چې له ټاکنو څنډې ته شم او یوازې د خپلې پاتې مودې لپاره د ولسمشر په توګه د خپلو دندو په ترسره کولو تمرکز وکړم.»
ښاغلي بایډن زياته کړې چې هغه به د دې اونۍ په وروستیو کې د دغې پریکړې په اړه په ډیر تفصیل سره له خلکو سره خبرې وکړي.
ولسمشر همداراز ويلي چې متحده ایالات هیڅکله د نن ورځې په پرتله د رهبري کولو لپاره په «ښه موقعيت» کې نه وه.
