چین د بهرنیو وګړو لپاره د وېزو ورکولو بهیر چې د کورونا ویروس د خپرېدو له امله درول شوی و له درېيو کلونو وروسته بېرته پيلوي.
د دغه هېواد د بهرنیو چارو وزارت په یوه خبرپاڼه کې ویلي چې د چین سفارتونه د روانې اونۍ له چهارشنبې څخه د نورو هېوادونو اوسېدونکو ته د هر ډول وېزو ورکولو بهیر پیلوي.
په دغه خبرپاڼه کې راغلي چې دا پرېکړه نوموړي هېواد ته د تګ راتګ د لازیاتې آسانتیا په موخه شوې ده.
چین همداراز ویلي چې بهرنیو وګړو چې د ۲۰۲۰ کال د مارچ له ۲۸مې مخکې یې په دې هېواد کې د کورونا ویروس د خپرېدو پرمهال وېزې اخیستې او د اعتبار نېټه یې نه ده تېره شوې، هم کولای شي چې چین ته سفر و کړي.
په ټولو بندرونو کې ددغه هېواد د وېزو مسوولین هم کولای شي هغو کسانو ته چین ته د تلو لازم شرایط لري، وېزې صادرې کړي.
له بلې خوا، رویټرز رپوټ ورکړی چې سیلانیان کولای شي، له وېزو پرته د چین په سویل کې هاینان ټاپو ته ورشي او همداراز تفریحي کښتۍ د شانګهای له بندره تېرېدای شي.
همداراز ګوانګدونګ ولایت ته له هانګ کانګ او ماکایو څخه د بهرنیو وګړو ډله ييز سفر او همداراز د ګوانګشي ژوانګ کورواکه سیمې ګویلین ښار ته د آسیايي هېوادونو ورتګ به له دې وروسته وېزو ته اړتیا ونه لري.
چین ته سفر د ۲۰۲۰ میلادي کال په لومړیو کې د کورونا ویروس د خپرېدو له امله ودرول شو. تېره میاشت ددغه هېواد چارواکو هم اعلان کړ چې د کورونا پرخلاف مبارزه کې بریالي شوي دي.
