ایران د نوبل د سولې جایزې ګټونکې نرګس محمدي وروسته له هغه په څه باندې اوو نورو کلونو بند محکومه کړه چې د خوړو اعتصاب یې پیل کړ.
د هغې پلویانو د یکشنبې په ورځ وویل چې دا پرېکړه په داسې حال کې شوې چې تهران د هېواد په کچه له لاریونونو او د امنیتي ځواکونو له خوا د زرګونو کسانو له وژل کېدو وروسته، د هر ډول مخالفت ځپلو ته زور ورکړی دی.
نرګس محمدي، چې د بشري حقونو فعاله ده، له کلونو راهیسې د ایران په زندان کې ده. د هغې د بنسټ (Narges Foundation) له خوا په خپرو شویو انځورونو کې، چې د تېر ۲۰۲۴ کال د ډسمبر په څلورمه نېټه کله چې هغه د درملنې په موخه په لنډمهاله رخصتۍ خوشې شوې وه، اخیستل شوی؛ د هغې پر لاس په فارسي ژبه لیکل شوي: “جنسیتي اپارټایډ پای ته ورسوئ.”
دا نوی حکم په داسې حال کې صادرېږي چې د ایران حکومت د نړیوالو فشارونو سره سره د فعالانو پر وړاندې خپل سخت دریځ ته دوام ورکوي.
نرګس محمدي چې په ۲۰۲۳ کال کې یې په ایران کې د ښځو د حقونو او د ټولو لپاره د بشري حقونو او ازادۍ د مبارزې په پار د نوبل د سولې جایزه وګټله، له کلونو راهیسې د تهران په اوین زندان کې د بند شپې او ورځې تېروي.
هغې ته د بند د نوې مودې زیاتول د بشري حقونو د بنسټونو له خوا د ایران د حکومت د هغې پالیسۍ برخه بلل کېږي چې غواړي د مدني فعالانو غږ په بشپړ ډول غلی کړي.
