د امریکا ولسمشر ډونالډ ټرمپ او د چین ولسمشر شي جینپینګ د پنجشنبې په ورځ د جنوبي کوریا په بوسان ښار کې مخامخ ولیدل، څو د دواړو هېوادونو ترمنځ د څو میاشتو راهیسې روانې سوداګریزې شخړې راکمې کړي.
دغې ناستې شاوخوا یو ساعت او ۴۰ دقیقې دوام وکړ، او د اجنډا مهم ټکي یې تعرفې، د کمپیوټري چپونو تجارت، د نادره منرالو صادرات، او نور اقتصادي اختلافونه وو. ټرمپ له ناستې مخکې ویلي وو چې تمه لري له شي جینپینګ سره یوې هوکړې ته ورسېږي.
تر غونډې وروسته سپینې ماڼۍ د خبرو جزییات نه دي خپاره کړي، او ټرمپ د خبري غونډې له ترسره کولو پرته واشنګټن ته ستون شو.
ولسمشر ټرمپ تر دې مخکې ویلي وو، کېدای شي پر چین لګېدلې تعرفې راکمې کړي، ځکه تمه لري چین د فېنتانېل (یو نشهيي مواد) د قاچاق د مخنیوي په برخه کې له امریکا سره مرسته وکړي.
شي جینپینګ په پرانیستونکې وینا کې ویلي، که څه هم د دواړو هېوادونو ترمنځ کله ناکله اختلافونه رامنځته کېږي، خو امریکا او چین کولای شي یو د بل په بریالیتوب او سوکالۍ کې مرسته وکړي.
د ټرمپ دغه لیدنه د اسیا د سفر وروستۍ برخه وه، چې په ترڅ کې یې مالیزیا، جاپان او جنوبي کوریا ته هم سفر کړی و.
دغه لیدنه په داسې حال کې ترسره شوه چې د ټرمپ له لوري د تعرفو سخت دریځ او د چین له خوا د ځینو صادراتو محدودول، د نړیوال اقتصاد د بېثباتۍ اندېښنې زیاتې کړې دي.
