د امریکا ولسمشر ډونالډ ټرمپ او د چین ولسمشر شي جینپینګ د ټيکټاک د راتلونکي په اړه د یوې مهمې ناستې پلان لري چې تر راتلونکو شپږو اوونیو پورې به د سویلي کوریا په ګیونګجو ښار کې ترسره شي. دواړه مشران به په دغه لیدنه کې د سوداګرۍ، فینټانېل په نوم د ناقانونه موادو او د اوکراین جګړې په اړه هم خبرې وکړي.
ټرمپ د جمعې په ورځ په سپینه ماڼۍ کې خبریالانو ته وویل چې شي د ټيکټاک د هوکړې ملاتړ کړی دی او «دا معامله پر خپل مسیر روانه ده.» نوموړي زیاته کړه چې د دواړو مشرانو ترمنځ تلیفوني خبرو شاوخوا دوه ساعته دوام وکړ او په ترڅ کې یې د نورو مهمو موضوعاتو په اړه هم پرمختګ وشو.
دواړه هېوادونه د اکتوبر په ۳۱مه د آسیا ـ آرام سمندر اقتصادي همکاریو (APEC) غونډې پر مهال د نورو خبرو اترو لپاره هم سلا شوي دي. ټرمپ اعلان وکړ چې د راتلونکي کال په لومړیو کې به چین ته سفر وکړي، او شي به وروسته امریکا ته ولاړ شي.
د ټيکټاک موضوع هغه وخت لا جدي شوه کله چې د امریکا کانګرس پرېکړه وکړه که د ۲۰۲۵ د جنورۍ تر نیټې پورې د دې اپلیکیشن شتمنۍ له چینایي شرکت بایټډانس نه امریکایي مالکانو ته انتقال نه شي، نو په امریکا کې به وتړل شي.
سره له دې، د معاملې ځینې مهمې برخې لا هم روښانه نه دي، لکه د شرکت د مالکیت جوړښت، د اپلیکیشن د الگوریتم کنټرول او د کانګرس احتمالي پرېکړه. ټرمپ وویل: «موږ به ډېر کلک کنټرول ولرو» او ټینګار یې وکړ چې دا مسایل به د خبرو له لارې حل شي.
شنونکي باور لري چې دغه ناسته د واشنګټن او بیجینګ ترمنځ کړکېچ یو څه راکمولی شي، خو د دواړو لوریو د سیالۍ او بې باورۍ ژورې ستونزې به لا پر ځای پاتې وي.
