د قطر صدراعظم او د بهرنیو چارو وزیر شیخ محمد بن عبدالرحمن آل ثاني ویلي، اسرایلو چې تېره اونۍ پر دوحه برید کړی، هغه یو “وحشیانه عمل” و او هېڅکله به بې ځوابه پاتې نه شي.
هغه د یکشنبې په ورځ په دوحه کې د عربو او اسلامي هېوادونو د بهرنیو چارو وزیرانو غونډې ته وویل، قطر به د خپل حاکمیت د خوندي کولو لپاره قانوني او نړیوال ګامونه پورته کړي. د ده په وینا، دا برید یوازې د قطر پر خاوره نه و، بلکې د سولې هڅو او د سیمې ثبات ته یې هم ضربه ورکړه.
دغه برید د سې شنبې په ورځ شوی و، چې د حماس پنځه غړي او یو قطري امنیتي افسر پکې وژل شوي وو. برید د هغه پلاوي غونډې ته نږدې شوی و چې د امریکا په منځګړیتوب یې د غزې د اوربند پر تړون خبرې کولې.
قطر د عربو او اسلامي هېوادونو د ملاتړ ستاینه کړې او ویلي یې دي چې دا ملاتړ به دغه هېواد ته زمینه برابره کړي چې د اسرایلو پر وړاندې قاطع دریځ ولري. د قطر صدراعظم ټینګار وکړ چې نړیواله ټولنه باید له دوهګوني چلند لاس واخلي او اسرایل د خپلو کړنو لپاره حساب ورکولو ته رامخکې کړي.
په دوحه کې د عربي اتحادیې او د اسلامي همکاریو سازمان استازو پر دې خبرې کړې چې د اسرایلو پر وړاندې ګډ پرېکړهلیک جوړ کړي. د ټولنې سرمنشي حسین ابراهیم طه اسرایل په “دولتي تروریزم” تورن کړی او د عرب ټولنې مشر احمد ابو الغیط ویلي، اسرایل د ملکي خلکو د وژلو او د جنګي جرمونو مسوول دی.
تمه کېږي نن د دوشنبې بیړنۍ سرمشریزه د اسرایلو د برید په ځواب کې یو سخت او واحد دریځ اعلان کړي، څو دا پیغام ورکړل شي چې د قطر پر ضد بریدونه به بې ځوابه نه پاتې کېږي.
