د سعودي عربستان د بهرنیو چارو وزارت د افغانستان په ختیځ کې د زلزلې له امله د وژل شویو کسانو کورنیو ته خپله خواخوږي او تسلیت وړاندې کړی دی.
وزارت په خپل بیان کې ویلي چې د افغانستان په ختیځ کې رامنځته شوې زلزلې د ګڼو کسانو ژوند اخیستی او کورنۍ یې له سخت غم سره مخ کړې دي. سعودي عربستان د قربانیانو له کورنیو سره د خواخوږۍ ترڅنګ د ټپیانو د ژر روغېدو هیله هم څرګنده کړې ده.
سعودي عربستان له کلونو راهیسې د طبیعي پېښو پر مهال له افغانستان سره د بیړنیو مرستو اوږد تاریخ لري. د سعودي د بشري مرستو مرکزي اداره (KSRelief) تل د خوړو، درملو، خیمو او نورو اړتیاوو په لېږلو سره د افغان زیانمنو کورنیو د ملاتړ لپاره بیړني ګامونه اخیستي، او تمه کېږي چې د وروستي زلزلې په تړاو هم ورته اقدامات ترسره کړي.
