په غزې کې د اسرائیلي بریدونو له دوام سره هم مهاله، خلک له سختې لوږې سره مخ دي. الجزیرې راپور ورکړ چې په تېرو ۲۴ ساعتونو کې شپږ نور کسان د لوږې له امله مړه شوي دي.
وږی نفوس هره ورځ خپل ژوند په خطر کې اچوي ترڅو د ځان او خپلو ماشومانو لپاره د خوړلو یو څه تر لاسه کړي.
د غزې چارواکو اعلان وکړ چې د بشري مرستو له ۲۲ زرو څخه ډیرې لارۍ د پولې تر شا انتظار باسي؛ خو اسرائیل د شنبې په ورځ یوازې ۳۶ لاریو ته اجازه ورکړې چې غزې ته ننوځي. د دې مرستې لویه برخه د ویشلو دمخه د وږو خلکو لخوا لوټ شوه.
د دوشنبې تر ورځې پورې، څه کم ۱۸۱ کسان، چې ۹۴ یې ماشومان وو، د لوږې او خوارځواکۍ له امله مړه شوي دي.
د غزې اوسېدونکی، سلیم عصفور، وايي: «زه تشناب ته نشم تللی. دا واقعاً سخته ده. زه تشناب ته د تګ ستونزه لرم. د خوړو او اوبو د نشتوالي له امله. هيڅ خواړه نشته، هیڅ څه نشته.»
دا په داسې حال کې ده چې یوازې په تیرو ۲۴ ساعتونو کې د خوارځواکۍ له امله شپږ نوي مړینې ثبت شوې دي.
په همدې حال کې، ۲۱ فلسطینیان هم د اسراییلو په هوایي او ځمکنیو بریدونو کې وژل شوي دي.
د غزې اوسېدونکې وايي: «دلته حتی ماشومان سوځي. ماشومان مې وسوځېدل. د دوی ګناه څه ده؟ ما ته یې تشریح کړئ. دوی له هرڅه محروم وو. دوی د شپې ډوډۍ نه وه خوړلې. د هغه جامې وسوځول شوې او زما جامې هم وسوځول شوې.»
طبي سرچینو الجزیرې ته ویلي چې له قربانیانو اووه یې په رفح ښار کې د غزې د بشري مرستو د ویش مرکز ته نږدې د اسراییلي سرتیرو په ډزو کې ووژل شول.
په دې برید کې شل نور هم ټپیان شول. له بلې خوا حماس اعلان وکړ چې دوی به سره صلیب ته اجازه ورکړي چې له اسراییلي یرغمل شویو سره مرسته وکړي.
دې ډلې مخکې د دوو اسراییلي یرغمل شویو کسانو انځورونه خپاره کړي وو؛ په دې انځورونو کې یرغمل شوي کسان کمزوري ښکاري او یو یرغمل شوی کس داسې ښکاري چې له ډېر کمزوري او ډنګر بدن سره وایي: «زه دا مهال خپله قبر کېندم.»
د سره صلیب نړیوالې کمېټې ویلي چې د انځورونو له لیدلو سخته حیرانه شوې ده.
دا په داسې حال کې ده چې اسراییلي وګړو په تل اویو کې لاریونونو ته دوام ورکړی، دوی د جګړې د پای ته رسولو او د یرغمل شویو کسانو د بیرته راستنیدو غوښتنه کوي.
یو شمیر رسنیو راپور ورکړ چې پولیسو له لاریون کونکو سره له تاوتریخوالي ډک چلند کړی، او یو لاریون کوونکی له ټپي کیدو وروسته روغتون ته وړل شوی دی.
