ډاکټرانو د غزې تړانګې په سوېل کې د ناصر روغتون د تخلیې کار بشپړ کړ.
په دې سیمه کې د اسراییلو په بریدونو کې په تیرو ۲۴ ساعتونو کې ۱۰۳ تنه وژل شوي دي.
د غزې د روغتیا وزارت وايي، په تېرو څلورو میاشتو کې ۱۹ زره ۱۹۵ فلسطینیان وژل شوي دي.
په همدې حال کې په غزه کې د اوربند د ټینګښت لپاره ډیپلوماټیکې هڅې دوام لري.
سویلي افریقا د لاهې له نړیوالې محکمې غواړي چې په فلسطین کې د اسراییلو حضور غیر قانوني اعلان کړي.
په هالنډ کې د سویلي افریقا سفیر ووسیموزي مادونسلا وايي: «په تیرو ۱۳۶ ورځو کې، نړۍ په غزې باندې وحشتناک، ورځني، بې رحمانه بریدونه، او د غزې په وړاندې د اسراییلو د وروستۍ لښکرکشۍ تاوتریخوالی او د نړیوالو قوانینو سرغړونه ننداره کړه.»
له بلې خوا قطر اعلان کړی چې له ننګونو سره سره د اوربند او له حماس د اسرائیلي یرغمل شویو بندیانو د خلاصون هڅو ته دوام ورکوي.
دغه هیواد همدارنګه له نړیوالې ټولنې غوښتي چې اسرائیلو ته پر رفح ښار د برید اجازه ور نه کړي.
د قطر د بهرنیو چارو وزارت ویاند ماجد انصاري ویلي: «موږ ټول باید د دې برید د مخنیوي لپاره فشار راوړو او همدارنګه یوه بشري دمه تضمین کړو چې ځینو خلکو ته اجازه ورکړي ترڅو بیرته خپلو عادي سیمو ته ستانه شي.»
په همدې حال کې د حماس مشر مصر ته تللی چې د اوربند او د بندیانو پر تبادلې خبرې وکړي.
د سه شنبې په ورځ یو شمیر اسراییلیان یو ځل بیا د کرم شیلوم په کرښه راټول شوي وو څو غزې ته د بشري مرستو د تګ مخه ونیسي.
په ورته مهال د اسراییلو او د لبنان د حزب الله ترمنځ د ډزو تبادلې زور اخیستی دی.
د سه شنبې په ورځ حزب الله د اسرائیلو شمالي برخه په نښه کړه. د دې ډلې په وینا دوی اسراییلي ځواکونه هدف ګرځولي وو.
تر اوسه په دې برید کې د مرګ ژوبلې په اړه څه نه دي ویل شوي.
په وروستیو ورځو کې اسرائیلو په لبنان کې دننه د حزب الله ډېری مرکزونه په نښه کړي دي.
