د چیلي په ځنګلونو کې له سختې اورلګېدنې وروسته د مړو شمېر ۱۱۲ تنو ته زیات شوی دی.
د شیلي ولسمشر ګابریل بوریک ویلي: «زموږ هېواد له لویې تراژیدۍ سره مخ دی.»
رویټرز ددغه هېواد چارواکو له قوله رپوټ ورکړی چې لا هم سلګونه تنه بېدرکه دي او د تلفاتو د زیاتوالي احتمال شته.
ددغه هېواد مرستندویه ډلې د اورلګېدنې له امله د غونډیو په لمنو او ورانو شویو کورونو کې د مړو د موندلو په لټه کې دي.
په دغه هېواد کې اورلګېدنه له دوو ورځو راهیسې روانه ده او له امله یې ګڼ شمېر کورونه په بشپړ ډول وران شوي دي.
