د چهارشنبې په ورځ یوه موټر د کاناډا او متحده ایالاتو په پوله نیاګارا ابشار ته نږدې د تلاشۍ تمځای کې چاودنه وکړه چې په پایله کې یې دوه تنه مړه شول.
دا پېښه د امنیتي اندېښنې رامنځته کېدو او د دواړو هېوادونو ترمنځ د څلورو سرحدي بندرونو د تړلو او همدارنګه د نیویارک د بوفالو نړیوال هوايي ډګر د بندېدو لامل شوه.
ایالتي چارواکو ویلي، چې داسې هېڅ سند نشته چې وښيي دا یوه ترهګریزه پېښه ده. دغو چارواکو ویلي چې ښايي دا پېښه قصدي وي.
د نیویارک والي کتي هوچل وویل: «اوسمهال د ترهګریز برید هېڅ نښه نشته. اجازه راکړئ بیاځلي ووایم؛ اوسمهال د نیویارک په ختیځ کې د ترهګریز برید هېڅ نښه نه شته.»
د دې پېښې تصویرونه د امنیتي کمرو له خوا اخیستل شوي او د امریکا د ګمرک او سرحدي خوندیتوب سازمان له خوا پر ایکس ټولنیزه شبکه خپاره شوي دي.
دا تصویرونه ښيي چې یو موټر د متحده ایالاتو له خوا په چټکۍ سره روان دی. وروسته له هغې یې له یوه څه سره ټکر وکړ او له ځمکې پورته شو او له راغورځېدو وروسته یې چاودنه وکړه.
