په دې ورځ، شپږو کسانو په نظامي یونیفورم کې د ښوونځي انګړ ته په ننوتلو سره پر زده کوونکو او کارکوونکو ډزې وکړې، چې په پایله کې یې ۱۴۷ زده کوونکي او ښوونکي و وژل شول.
پاکستانۍ رسنیو جیو نیوز په دې اړه خپاره کړي راپور کې وايي دا پېښه د هېواد په تاریخ کې تر ټولو دردناکه غمیزه بلل کېږي.
د دې ورځې په مناسبت، ولسمشر آصف علي زرداري او لومړي وزیر شهباز شریف د ملت هوډ تکرار کړ چې له ترهګرۍ سره به مبارزه کوي.
ولسمشر زرداري وویل چې د ترهګرو یا د هغوی د ملاتړ کوونکو لپاره “نرم والی نشته” او “د هغو کسانو سره به هېڅ ډول خبرې ونه شي چې پر دولت وسلې را اخلي.” هغه زیاته کړه چې د اې پي اېس د قربانیانو یاد دوی ته ځواک وربخښي.
ولسمشر دغه راز وویل چې د هند په ملاتړ تروریزم په کلکه غندي او ټینګار یې وکړ چې د دې دښمنانه فعالیتونو شواهد مستند شوي دي.
لومړي وزیر شهباز شریف وویل چې د پېښور د دې غمیزې قرباني “زموږ په ملي وجدان کې د تل لپاره ثبت شوې ده.” هغه زیاته کړه چې ملت به تل د ترهګرۍ د له منځه وړلو لپاره متحد او ټینګ پاتې شي.
د کورنیو چارو وزیر محسن نقوي دا غمیزه د “پاکستان په تاریخ کې یو له تر ټولو زړه بوږنوونکو فصلونو” څخه وبلله او ویې ویل چې د ترهګرۍ پر وړاندې په جګړه کې هېڅ مصلحت نشته او دا پدیده د هیڅ نوم یا بیرغ لاندې د منلو وړ نه ده.
دا په داسې حال کې ده چې د نړیوالې ټولنې او په ځانګړي ډول د هند له خوا، پاکستان له ډېرې مودې راهیسې په دې تورن دی چې د ترهګرو ډلو ملاتړ کوي او پټنځایونه ورکوي.
د زلمي خلیلزاد په توګه نړیوالو پیژندل شویو سیاستوالو په ځلونو دا اندېښنه څرګنده کړې چې د پاکستان خاوره د هغو ډلو لپاره د خوندي مرکز په توګه کارول کېږي چې په سیمه کې بریدونه کوي.
هندوستان په پرله پسې ډول داسې شواهد وړاندې کړي دي چې ادعا کوي د ترهګرو ډلو تر ټولو ډېر پټنځایونه او مالي ملاتړ د پاکستان له لوري کېږي، او دا په همدې حال کې د پاکستان دننه هم یو شمېر مدني فعالان او ملتپال غړي په ښکاره دا غږونه پورته کوي چې د دغه ډول دهشتګردۍ تر شا د پاکستان پوځ لاس لري یا یې ملاتړ کوي.
دا تورونه او داخلي ناندرۍ د سیمې په امنیت او د پاکستان په نړیوال اعتبار باندې ژور منفي اغېز لري.
