د امریکا منتخب ولسمشر ډونلډ ټرمپ د فلوریډا ایالت د کانګرېس غړی او د امریکا د پوځ ۵۰ کلن متقاعد افسر مایک والټز په خپله نوې اداره کې د ملي امنیت د سلاکار په توګه وټاکه.
د بلومبرګ سایټ لیکلي چې د ټرمپ دې پرېکړې ښاغلي والټز ته په سپینه ماڼۍ کې د بهرنۍ پالیسۍ د همغږي کولو او د نړیوالو پرمختګونو په اړه د نوي منتخب ولسمشر د ساتلو لپاره د حیاتي ځواک په توګه ځای ورکړی دى.
مایک والټز چې پخپله يې هم څو ځله په افغانستان کې د متحده ایالاتو د ځانګړو ځواکونو د افسر په توګه دنده ترسره کړې، مخکې له دې په کانګرېس کې د بایډن د ادارې چارواکو ته له افغانستان څخه د لویو ځواکونو د ایستلو په اړه «تندې پوښتنې» راپورته کړې وې.
هغه مخکې په کانګرېس کې ویلي و چې ښايي امریکا له داعش او القاعده شبکې سره د مبارزې لپاره بېرته افغانستان ته وګرځي.
نوموړي د امریکا په دفاع وزارت کې د افغانستان په اړه د پالیسۍ د سلاکار په توګه هم کار کړی او د جګړې په ډګر کې د زړورتیا له امله څلور ځله د ستوري برږنزي جایزه هم ورکړل شوې ده.
د امریکا د ملي امنیت د سلاکار په توګه د نوموړي ټاکنه په داسې حال کې کېږي، چې ډونلډ ټرمپ تر دې دمه د کانګرېس له استازو څخه مایک والټز د خپلې نوې ادارې لپاره د دویم کس په توګه نومولی او تر دې وړاندې اليس سټیفانیک هم په ملګرو ملتونو کې د متحده ایالات د سفیر په توګه ټاکل شوی و.
د بلومبرګ د راپور له مخې، دا بهیر به ښايي د امریکا د استازو په مجلس کې د جمهوري غوښتونکو په اکثریت اغېز وکړي، چې احتمالاً په راتلونکې دوره کې به له بدلونونو او نویو ننګونو سره مخامخ شي.
د یادولو وړ ده چې ښاغلی والټز په پوځي برخه د مخينه درلودو سربیره د « ميتس سولشنز» په نوم د دفاعي مشورتي شرکت د مشري کولو تجربه هم لري چې د دفاعي او استخباراتي مشورې په برخه کې فعالیت کوي. هغه د ټرمپ او ایلن ماسک یو مهم ملاتړی هم پاتې شوی او په خپل وروستي کتاب کې یې د ایلن ماسک د ځانګړو لاسته راوړنو ستاینه کړې ده.
د هغه شالید ته په پام سره، والټز په یوه ننګونکي وخت کې د ملي امنیت مشاور په توګه کار کولو لپاره ښه چمتو دی.
په داسې حال کې چې د ملي امنیت سلاکارانو په ټاکلو کې د ټرمپ مخينه وړاندیز کوي چې دغه پوسټ ممکن د چټک بدلون تابع وي، والټز د ډونلډ ټرمپ په نوې اداره کې یو له مهمو شخصیتونو څخه شمېرل کېږي.
