د افغانستان د فوټسال ملي لوبډله د ۲۰۲۴ کال نړیوال جام کې خپله لومړۍ لوبه له انګولا سره کوي.
دا لوبه به د کابل پر وخت مازدیګر پنځه بجې په تاشکند ښار کې ترسره شي.
په ازبکستان کې د ۲۰۲۴ کال د فوټسال نړیوال جام سیالۍ پرون (شنبه د وږي ۲۴مه) پیل شوې.
افغانستان به په دریم ګروپ کې د اوکراین، انګولا او ارجنټاین له لوبډلو سره سیالي وکړي.
د هېواد د فوټسال ملي لوبغاړو ویلي چې د ۲۰۲۴ کال نړیوال جام ته سياليو لپاره ښه چمتووالى لري.
د یادولو وړ ده، چې د هیواد د فوټسال ملي لوبډله د راتلونکې اونۍ د چهارشنبې په ورځ د ارجنټاین پر وړاندې خپله تر ټولو سخته لوبه وکړي.
دا لومړی ځل دی چې افغانستان د فوټسال نړیوال جام ته لار موندلې ده.
