د پنجشنبې په ورځ د قرهباغ سیمې د بېلتون غوښتونکو ارمني استازو او اذربایجان ترمنځ د سولې خبرېاترې په یولاخ ښار کې پیل شوې.
د اذربایجان پوځ د چهارشنبې په ورځ په یوه ورځنۍ جګړه کې دا سیمه تسلیمۍ ته اړ ایستلې او د دواړو ترمنځ اوربند ټینګ شو.
د اذربایجان ولسمشر الهام علي اوف د قرهباغ سیمې له نیولو وروسته وویل، اذربایجان خپله بشپړه واکمنۍ ترلاسه کړه او د یوه جلا ارمني قرهباغ نظریه تاریخ ته وسپارل شوه.
الهام علي اوف زیاتوي: «په اذربایجان کې مېشت ارمني خلک زموږ وګړي دي. ارمني مليپالو، جنګي جنایتکارانو، د ارمنستان او قرهباغ مشرانو دوی په آسانۍ سره یرغمل ونیول او د دوی مغز یې مسموم کړ.»
آذربایجان د سهشنبې په ورځ پر دې بېلتون غوښتونکې سیمې عملیات پيل کړل. د راپورونو له مخې په دې عملیاتو کې ۲۷ تنه ووژل شول او تر ۲۰۰ زیات ټپیان دي.
په سیمه کې د روسیې سولهساتو ځواکونو هم تر ۵۰۰۰ زیات ملکيان له زیانمنوونکو سیمو وایستل.
ښاغلي باشینیان د پنجشنبې په ورځ د قرهباغ موضوع ته له اشارې پرته وویل، چې ارمنستان باید د خپلې خپلواکۍ لپاره له نښتې لیرې واوسي.
د ارمنستان لومړی وزیر نیکول پاشینیان وایي: «په دې شرایطو کې باید سولې ته ارزښت ورکړو او سوله باید د اوربند په توګه رانهشي. سوله له دولتي او قومیتي نښتو پرته چاپېریال دی. دا آسانه لار نه ده او موږ باید د خپلواکۍ، د هېواد ساتلو او د راتلونکي لپاره دا لار کچ کړو.»
د ارمني اوسېدونکو قرهباغ سیمه د نړیوالې ټولنې له خوا د آذربایجان د خاورې په توګه په رسمیت پېژندل کېږي، خو له څو لسیزو راهیسې د ارمنستان په ملاتړ د کورواکه حکومت له خوا اداره کېده.
آذربایجان او ارمنستان تر اوسه دوه ځله د غرني قرهباغ د واکمنۍ حق پر له یو بل سره جګړه کړې ده.
وروستی ځل دواړو هېوادونو په ۲۰۲۰ کال کې جګړه پيل کړه، چې د ارمني ځواکونو د پوځي ماتې لامل شوه او په پای کې یې د روسیې او ترکیې په منځګړیتوب پر اوربند هوکړه وکړه.
