په داسې حال کې چې د امریکا او ایران ترمنځ په اسلاماباد کې تاریخي خبرې پیلېږي، په واشنګټن کې د سپینې ماڼۍ چارواکو محتاطانه غبرګون ښودلی.
ولسمشر ډونالډ ټرمپ د خپلې ځانګړې الوتکې (Air Force One) ته له ختلو وړاندې خبریالانو ته وویل چې دی پر خپل مذاکراتي ټیم باوري دی، خو پایلې به وخت ثابتې کړي.
ټرمپ وویل: «موږ به وګورو چې څه کېږي. جي ډي ونس، سټیو او جریډ کوشنر یو پیاوړی ټیم دی او سبا له ایرانیانو سره ګوري.» نوموړي دا خبرې په ډېر ستراتیژیک انداز کې وکړې او ټینګار یې وکړ چې د سیمې اقتصادي او جیوپولیټیک ګټې به د دغو خبرو وروستۍ پایله ټاکي.
ولسمشر ټرمپ د هرمز تنګي په اړه وویل چې دغه لاره به خامخا پرانیستل شي. ده زیاته کړه: «امریکا په مستقیم ډول په دې تنګي تکیه نه لري، خو د نورو هېوادونو په مرسته به دغه مهمه سوداګریزه لاره پرانیزو.»
کله چې ترې وپوښتل شول که ډیپلوماسي ماتې وخوري، کومه بدیله طرحه (Backup Plan) لرئ؟ هغه په ډاډ سره وویل: «تاسو بدیلې طرحې ته اړتیا نه لرئ، دا کار به وشي.»
بل لور ته، د امریکايي پلاوي مشر او مرستیال ولسمشر جي ډي ونس وویل چې خبرې به مثبتې وي، خو تهران ته یې خبرداری ورکړ چې «زموږ سره د لوبې کولو هڅه ونکړئ.» دا څرګندونې ښيي چې سره له دې چې دواړه لوري مېز ته کېني، خو د باور نشتون لا هم په لوړه کچه شتون لري.
په واشنګټن کې د پاکستان سفیر، رضوان سعید شیخ له (NBC) سره په مرکه کې وویل چې اسلاماباد یوازې د یو منځګړي نه، بلکې د یو داسې پلیټ فارم په توګه رول لوبوي چې خبرو ته یې لاره هواره کړې. ده زیاته کړه چې په دې برخه کې د ترکیې، سعودي عربستان او مصر هڅې هم د ستاینې وړ دي.
سفیر شیخ وویل چې اوس مهال ټوله نړۍ دې ناستې ته په تمه ده. ده ټینګار وکړ چې د پاکستان مشرتابه ته یوازې په یوه ورځ کې له ۵۰ ډېر د ملاتړ ټلیفونونه شوي دي.
د ده په وینا، تر ټولو مهمه دا ده چې دواړه لوري په «رغنده روحیه» خبرو ته کېني.
