د ایران د پارلمان رئیس محمد باقر قالیباف نن یکشنبه د دغه هېواد په مجلس کې د وینا پر مهال امریکا ته خبرداری ورکړ چې که پر ایران کوم پوځي برید وکړي، د تهران ځواب به په سیمه کې د امریکايي پوځي مرکزونو او کښتیو په نښه کولو باندې تمرکز ولري.
قالیباف ټینګار وکړ چې ایران خپله “مشروع دفاع” یوازې د برید تر لیدو پورې محدوده نه ګڼي، بلکې که د احتمالي برید کومه څرګنده نښه وویني، نو له مخکې به اقدام وکړي. نوموړي ډونالډ ټرمپ او په سیمه کې د امریکا متحدینو ته په خطاب کې وویل چې په خپلو محاسباتو کې دې تېروتنه نه کوي، ځکه ایران دا مهال له خپلو دښمنانو سره په څلورو ډګرونو—اقتصادي، فکري، پوځي او ترهګریز—کې په جګړه بوخت دی.
دا تند غبرګون په داسې حال کې ښودل کېږي چې تازه امریکايي رسنیو رپوټ ورکړی چې ټرمپ ته په ایران کې د وروستیو اعتراضونو او د لاریونوالو د وژل کېدو په غبرګون کې، د یو شمېر پوځي انتخابونو په اړه معلومات ورکړل شوي دي.
که څه هم ویل کېږي چې د امریکا د احتمالي پوځي اقدام په اړه وروستۍ پرېکړه لا نه ده شوې، خو د قالیباف څرګندونې ښیي چې په سیمه کې د تهران او واشنګټن ترمنځ لفظي شخړه او پوځي کړکېچ یو ځل بیا اوج ته رسېدلی دی.
