اسرائیلي پوځ ویلي دي چې ځواکونو یې د پنجشنبې په لومړنیو ساعتونو کې په اشغال شوې لوېدیځه غاړه کې یو فلسطینی وژلی دی. د پوځ په وینا، دا ډزې پر هغو کسانو شوي چې پر سرتېرو یې ډبرې ویشتې.
د پوځ په اعلامیه کې زیاته شوې چې نابلس ته نږدې د لبان الشرقیه کلي په یوه اصلي سړک دوه نور کسان هم ویشتل شوي دي. پوځ دا کسان وسلهوال بللي او ویلي یې دي چې د ډبرو ویشتل د یوه کمین برخه وه.
په لوېدیځه غاړه کې فلسطیني چارواکو ویلي دي چې په دې پېښه کې یو ۲۶ کلن ځوان چې خطاب السرحان نومېده وژل شوی او یو بل تن ټپي دی.
د فلسطیني ادارې رسمي خبري اژانس، وفا، راپور ورکړی چې اسرائیلي ځواکونو د چهارشنبې په ورځ د نابلس د لبان الشرقیه کلي اصلي دروازه تړلې وه او څو نورې غاړې ته لارې یې هم بندې کړې وې.
ملګرو ملتونو ویلي دي چې د ۲۰۲۳ کال له اکتوبر څخه د ۲۰۲۵ کال تر اکتوبر پورې په لوېدیځه غاړه کې تر زرو زیات فلسطینیان وژل شوي دي، چې ډېری یې د امنیتي ځواکونو په عملیاتو او ځینې نور یې د یهودي مېشتو کډوالو په تاوتریخوالي کې وژل شوي.
په همدې موده کې، د فلسطینیانو په بریدونو کې ۵۷ اسرائیليان وژل شوي دي.
