د اسرائیل حکومت د جمعې په سهار له حماس ډلې سره د اوربند او د بندیانو د تبادلې تړون تصویب کړ. د دې پرېکړې له مخې، په راتلونکو ۲۴ ساعتونو کې به په غزه کې جګړه ودرېږي او د ۷۲ ساعتونو په ترڅ کې به د اسرائیلو هغه بندیان خوشې شي چې د حماس تر ولکې لاندې دي.
د تړون له مخې به په بدل کې د اسرائیلو له زندانونو څخه فلسطیني بندیان خوشې کېږي او د امریکا د ولسمشر ډونالډ ټرمپ د نوښت له مخې به د اسرائیلو پوځ له غزې څخه په پړاوونو کې وتل پیل کړي.
د اسرائیلو د لومړي وزیر بنیامین نتنیاهو د دفتر له قوله ویل شوي: «حکومت د ټولو بنديانو، ژوندیو او مړو، د خوشې کېدو چوکاټ تصویب کړ.»
دغه جګړه چې له دوو کلونو راهیسې روانه وه، د اسرائیلو نړیوال انزوا یې زیاته کړې او د منځني ختیځ وضعیت یې ګډوډ کړی و. د جګړې له پیل راهیسې تر ۶۷ زرو ډېر فلسطینیان وژل شوي، او اوس دا تړون د سولې تر ټولو ستر ګام بلل کېږي.
د حماس یو مشر خلیل الحیه ویلي چې امریکا او منځګړو هېوادونو ورته ډاډ ورکړی چې جګړه پای ته رسېدلې ده. د اسرائیلو د حکومت یو ویاند تایید کړې چې اوربند به د تصویب له ۲۴ ساعتونو وروسته عملي شي، او بیا به د ۷۲ ساعتونو په موده کې بندیان خوشې شي.
د راپورونو له مخې، شاوخوا ۲۰ اسرائیلي بندیان اوس هم ژوندي دي، ۲۶ مړه بلل کېږي، او د دوو کسانو برخلیک لا معلوم نه دی. حماس ویلي، د مړو جسدونه موندل ښايي وخت ونیسي.
د تړون تر عملي کېدو وروسته به د خوراکي او طبي مرستو موټرونه غزې ته ننوځي، څو هغو ملکي وګړو ته مرسته ورسوي چې د اسرائیلو د بمباریو له امله یې کورونه له منځه تللي او په خیمو کې اوسېږي.
د ټرمپ د ۲۰ ټکو د سولې پلان پاتې برخې، لکه له جګړې وروسته د غزې اداره او د حماس راتلونکی، لا تر بحث لاندې دي. د اسرائیلو د ائتلاف ځینې غړي د دې تړون مخالف دي، او د ملي امنیت وزیر ایتامار بنګویر ګواښ کړی که حماس منحل نه شي، حکومت به نسکور کړي.
د غزې خلکو د اوربند پر اعلان خوښي څرګنده کړې. د خان یونس اوسېدونکي عبدالمجید عبدالربو وویل: «شکر دی جګړه بنده شوه، د وینې تویېدنه ختمه شوه، ټوله غزه، ټول عرب او ټوله نړۍ خوشحاله دي.»
د اوربند تر رسمي پیل مخکې هم د اسرائیلو بمبارۍ دوام درلود، خو د مرګژوبلې شمېر د پخوانیو اوونیو په پرتله ډېر کم و.
ولسمشر ډونالډ ټرمپ به د یکشنبې په ورځ سیمې ته سفر وکړي او تمه ده چې په مصر کې د تړون د لاسلیک مراسمو کې برخه واخلي. د اسرائیلو د پارلمان رئیس هغه ته بلنه ورکړې چې په کنست کې وینا وکړي، دا به له ۲۰۰۸ راهیسې د یو امریکايي ولسمشر لومړۍ وینا وي.
دا تړون د عربي او لوېدیځو هېوادونو له خوا ستایل شوی او د ټرمپ لپاره د یوه مهم ډیپلوماټیک بري په توګه ګڼل کېږي. لوېدیځ او عربي هېوادونه به په پاریس کې د سولې ساتنې ځواکونو او د غزې د بیا رغونې د مرستو په اړه غونډه وکړي.
د امریکا د دفاع وزارت ویلي، دوی به د غزې د ثبات لپاره د ګډ ځواک په چوکاټ کې ۲۰۰ پوځیان وټاکي، خو هېڅ امریکايي عسکر به د غزې په خاوره کې نه ځای پر ځای کېږي.
د اسرائیلو او حماس ترمنځ دا تړون د دوو کلونو جګړې وروسته د سولې تر ټولو لویه هیله بلل کېږي.
