سرچینې وايي چې د ختیځ افغانستان په کونړ ولایت کې، د پاکستاني ځواکونو او طالبانو تر منځ پر ډیورنډ فرضي کرښې د نښتې پر مهال د طالبانو یو غړی وژل شوی دی.
د سرچینو په وینا، دا نښته د پنجشنبې سهار پیل شوې او د وقفې په ډول تر نن جمعې د سهار اتو بجو پورې دوام وکړ.
راپورونه ښيي چې دغه نښته د کونړ ولایت په ناړۍ په ولسوالۍ کې رامنځته شوې ده.
د ځايي معلوماتو پر بنسټ، هغه طالب چې په دې نښتو کې وژل شوی «زرین خان» نومېدلو او د لغمان ولایت د قرغه يي ولسوالۍ اوسېدونکی و.
سرچینې زیاتوي چې د جګړې د شدت له امله شاوخوا شل کورنۍ له سیمې کډوالې شوې دي.
دا پېښه په داسې حال کې رامنځته کېږي چې د ملګرو ملتونو د روان میلادي کال د سپټمبر میاشتني راپور له مخې، په دغه کال کې د پاکستاني ځواکونو او طالبانو تر منځ لږ تر لږه ۱۴ نښتې او د ډزو تبادلې شوې دي.
