سرچینې آمو ته ویلي، عبدالولي نعیمي چې د افغانستان د تېر حکومت د ځانګړو پولیسو پخوانی افسر و، مړی یې له ورکېدو نږدې دوه اوونۍ وروسته په کابل کې موندل شوی دی.
د سرچینو په وینا، ښاغلی نعیمي د پنجشیر اصلي اوسېدونکی و او د روان کال د اسد په ۲۴مه له ایران څخه کابل ته راستون شو؛ خو یوازې دوه ورځې وروسته، د اسد په ۲۶مه، ورک شوی و
سرچینې زیاتوي، د نعیمي کورنۍ د هغه مړی دوه اوونۍ وروسته د کابل په عدلي طب ریاست کې پیدا کړ.
د سرچینو په خبره، «د مړي پر سر او غاړه د دوو مرمیو نښې ښکارېدې، کیڼ لاس یې مات شوی و او د شکنجې نښې هم پرې لیدل کېدې.»
په هغو انځورونو کې چې آمو ته رسېدلي، د نعیمي په تندي او پزې کې ټپونه ښکاري؛ خو آمو یې د خپرولو پرېکړه نه ده کړې.
سرچینې وايي، د لاسونو له ټپونو څرګندېږي چې د شکنجې پر مهال یې لاسونه د شا له اړخه تړل شوي وو.
عبدالولي نعیمي واده کړی و او څلور ماشومان ترې پاتې دي.
تر دې دمه طالبانو د دغه پخواني امنیتي افسر د وژل کېدو په اړه څه نه دي ویلي.
د بشري حقونو سازمان شپږ میاشتنی راپور ښيي چې په افغانستان کې د طالبانو تر واک لاندې، د ۲۰۲۵ کال په لومړیو شپږو میاشتو کې ناقانوني وژنې د تېر کال په پرتله ۳۰ سلنه ډېرې شوې دي.
په داسې حال کې چې ایران او پاکستان په روان کال کې له دوو میلیونو ډېر افغان کډوال شړلي دي. د دغو کسانو په منځ کې د تېر حکومت کارکوونکي، د امنیتي او دفاعي ځواکونو پخواني غړي، خبریالان او د بشري حقونو فعالان هم شامل دي، چې د هغوی په وینا په افغانستان کې له نیول کېدو، شکنجې او مرګ سره مخ دي.
