د باجوړ امن جرګې او پاکستاني طالبانو تر منځ د سولې خبرې لاهم روانې دي، خو پاکستاني امنیتي چارواکو ټینګار کړی چې د دولت ضد عناصرو سره به هېڅ ډول جوړجاړی ونه شي.
د ډان ورځپانې راپور ورکړی، چې د دغو خبرو موخه په سولهییزه توګه افغانستان ته د ټيټيپي غړو ستنېدل دي.
د جمعې په ورځ د جرګې د غړو او د تحریک طالبان پاکستان د مشرانو تر منځ د خبرو اووم پړاو ترسره شو.
د سرچینو په وینا، وزیر اعلی او امنیتي چارواکو له قبایلي مشرانو غوښتي چې بهرني وسلهوال ــ چې زیاتره یې افغانان دي ــ له سیمې وباسي او که دا کار نه کېږي، نو د یوې یا دوو ورځو لپاره دې سیمه پرېږدي څو د وسلهوالو پر ضد عملیات وشي.
وزیر اعلی او امنیتي چارواکو د ترهګرو پر ضد د عملیاتو د هر قیمت په بدل کې د دوام ژمنه وکړه او ټینګار یې وکړ چې باید د ملکي تلفاتو مخه تر ډېره ونیول شي.
د امنیتي سرچینو په وینا، تر هغه چې وسلهوال یا د هغوی ملاتړي تسلیم نه شي، له هغوی سره د حکومت مستقیمې خبرې هېڅ امکان نه لري. هغوی وویل چې روانه قبایلي جرګه د هر ډول احتمالي عملیاتو له وړاندې د خلکو د خونديتوب لپاره یوه منطقي هڅه ده.
سرچینو دا هم وویل چې هم دولت او هم د سیمې اوسېدونکي له وسلهوالو سره د هر ډول جوړجاړي مخالف دي. د هغوی په وینا، د وسلهوالو پر ضد د پوځي عملیاتو واک یوازې د دولت په لاس کې دی.
په همدې حال کې، د باجوړ امن جرګې د غړو او د وسلهوالو مشرانو تر منځ د خبرو اووم پړاو د جمعې ماښام د لوې ماموند په تحصیل کې پای ته ورسېد. د جرګې مشر صاحبزاده هارون رشید د خبرو د پایلو په اړه رسنیو ته معلومات ورنه کړل، خو ډېر امکان شته چې جرګه به ژر له رسنیو سره د نوو پرمختګونو په اړه خبرې وکړي.
