د جرمني د کورنیو چارو وزارت اعلان کړی چې د کډوالو لپاره یې د بشرپال ویزو داوطلبانه پروګرامونه ځنډولي دي.
یاد وزارت دا پرېکړه د پنجشنبې په ورځ د خپل رسمي وېبسایټ له لارې اعلان کړې ده، چې د جرمني د نوي حکومت د مهاجرتي سیاستونو د پراخو بدلونونو یوه برخه بلل کېږي. دا نوی حکومت د محافظهکارانو په مشرۍ روان دی.
ځنډول شوي پروګرامونه هغه پلانونه وو چې په ځانګړو مواردو کې یې هغو افرادو ته، چې له جدي ګواښ سره مخ وو – لکه د روسیې مخالفین یا په ترکیه کې مېشت سوریایي کډوال – د خوندي تېرېدو ویزې ورکولې.
دا پروسه اوس په بشپړه توګه درول شوې، او د کورنیو چارو وزارت ویاند ویلي چې د واکمن ائتلاف د هوکړې له مخې، دا پروګرامونه به ډېر ژر دایمي پای ته ورسېږي.
دا اقدام له هغې لانجې وروسته ترسره شوی چې د طالبانو له لوري د ګواښل شویو افغانانو د میشتولو لپاره د یوې ځانګړې پروژې په اړه راپورونه خپاره شول.
له هغه وخته چې طالبان په ۲۰۲۱ کال کې واک ته رسېدلي، جرمني له ۴۵ زره زیات افغان وګړي – چې پکې د جرمني ځواکونو پخواني سیمهییز کارکوونکي هم شامل دي – د همدې پروګرام له لارې منلي دي.
خو د روان میلادي کال په پیل کې، یو شمېر رسنیو راپور ورکړ چې ځینې افغان کډوال پرته له کافي امنیتي ارزونې جرمني ته داخل شوي، او د هغوی د هویتونو په اړه شکونه راپورته شول. سره له دې، د اولاف شولڅ تر مشرۍ لاندې پخواني حکومت دا ادعاوې رد کړې وې او ویلي یې وو چې ټول کډوال د راتګ مخکې ارزول شوي دي.
اوس، له دغو پروګرامونو سره د تعلیق له امله شاوخوا ۲۳۰۰ تنه افغان غوښتونکي چې چمتو ول جرمني ته سفر وکړي، په پاکستان کې بې برخلیکه پاتې دي.
په همدا حال کې، د روانې میاشتې په پیل کې د برلین یوه اداري محکمې پرېکړه وکړه چې که د جرمني حکومت رسمي ژمنه ورکړې وي، نو باید کډوالو ته د خوندي تېرېدو اجازه ورکړل شي. دا حکم په ځانګړي ډول د یوې افغانې کورنۍ قضیه ته اشاره درلوده.
د جرمني د بهرنیو چارو وزارت د معلوماتو له مخې، تېرو څلورو کلونو کې د جرمني له لوري تر ټولو زیات بشرپال ویزې افغان وګړو ته ورکړل شوې دي.
خو د ویزو ورکړه په وروستیو کلونو کې کمه شوې، چې له ۲۳ زره کسانو په ۲۰۲۲ کال کې، ۱۰ زره او ۵۰۰ کسانو ته په ۲۰۲۴ کې راکمه شوې ده.
د جرمني د محافظهکار حکومت دا تازه پرېکړه د بشري حقونو بنسټونو او د کډوالو ملاتړو سازمانونو له سختو نیوکو سره مخ شوې، او د زیانمنو کډوالو، په تېره بیا افغانانو، راتلونکی یې له لا ډېرو اندېښنو او ابهام سره مخ کړی دی.
