د ملګرو ملتونو د بشري چارو د همغږۍ دفتر (اوچا) په خپل تازه راپور کې ویلي، چې افغانستان لاهم له پراخې وچکالۍ او د اوبو له سخت کمښت سره مخ دی.
په دغه راپور کې، راغلي چې د ټول هېواد په کچه د باران اندازه له اوسط څخه کمه پاتې شوې ده او یوازې ځینې لرې پرتې سیمې د باران نورمالې سطحې ته نږدې شوي دي.
د راپور موندنې ښيي چې د واورې د اوبو کچه کمه شوې او د ډېری سیندیزو حوضونو د خاورې رطوبت ټیټ شوی، چې دا چاره د اوبو د ورځ تر بلې زیاتیدونکي کمښت لامل شوې او پر کرنه او بوټو ډېره منفي اغېزه کړې ده.
د کرنې د ستونزې شاخص ښيي چې د وچکالۍ اغېزې له فاریاب څخه د بادغیس، هرات او جوزجان ولایتونو ته هم غځېدلې دي.
اوچا وايي چې د فراه، غور، هلمند او د هېواد سوېل ختیځو برخو ولایتونه د خاورې له ډېر ټیټ رطوبت څخه کړیږي او د مرکزي سیمو ولایتونه هم د پام وړ باران کمښت سره مخ دي.
برسېره پردې، د هېواد په ډېرو سیمو کې د هوا سطحه د منځني حالت څخه لوړه ده او تمه ده چې دا وضعیت به په راتلونکو میاشتو کې هم دوام ومومي.
ملګرو ملتونو خبرداری ورکړی چې د دغه وضعیت دوام کولای شي د کرنیزو حاصلاتو د پام وړ کمښت، د څړځایونو زیان او د هېواد د بشري اړتیاوو زیاتوالي ته لار هواره کړې ده.
په دغه راپور کې فاریاب او جوزجان د تر ټولو زیانمنو سیمو په توګه یاد شوي او هلمند، هرات، کندز او ننګرهار ولایتونه هم د خبرداري په کچه کې ځای لري.
د بشردوستانه چارو د همغږۍ دفتر له ټولو مرستندویه بنسټونو غوښتي چې دې بېړني وضعیت ته د رسیدګۍ لپاره چمتوالی ولري.
