د سره صلیب او سرې میاشتې ټولنې نړیوال فدراسیون وايي چې د پاکستان څخه د افغان مهاجرو جبري ايستل، په افغانستان کې وضعيت ډېر نازک کړی او د بنسټونه د خدماتو وړاندې کولو هڅې يې پېچلي کړې دي.
په دې راپور کې ويل شوي چې د ۲۰۲۳ کال د سپتمبر له ۱۵مې نېټې راهيسې تر اوسه پورې، نږدې يو ميليون افغان مهاجرين د پاکستان څخه په «اختیاري او جبري» ډول ايستل شوي او د تورخم، سپين بولدک او غلام خان لارو او همدارنګه د غيررسمي لارو څخه افغانستان ته راستانه شوي دي.
د سره صلیب او سرې میاشتې ټولنې نړیوال فدراسیون وايي چې يوازې د روان کال د اپريل مياشت کې تر ۱۴۴ زره او ۵۰۰ ډېر کسان افغانستان ته راستانه شوي، چې له ډلې يې له ۲۹ زره او ۹۰۰ زيات کسان په جبري ډول پاکستان پرېښی دی. په دې مياشت کې په اوسط ډول هره ورځ له ۴ زرو تر ۶ زرو مهاجر افغانستان ته راستانه شوي دي.
په راپور کې راغلي چې ډېر شمير بېرته راستنېدونکي مهاجر، چې پکې ښځې، ماشومان، زړې ښځې او سړي، معلوليت لرونکي او هغه کسان شامل دي چې له فقر او دوامداره پورونو سره مخ دي، ډېر زيانمن دي او له بېلابېلو خطرونو سره مخ دي.
دا اداره ټینګار کوي چې د راستنېدونکو مهاجرو زياتېدل، په داسې حال کې چې وچکالي دوام لري، داخلي بېځايه کېدونکي زيات شوي او اقتصادي وضعيت ورځ تر بلې خرابېږي، په افغانستان کې اوس ډېر فشار راوستی دی. د ننگرهار، کندهار، خوست، هلمند، هرات په څېر سرحدي ولايتونو او کابل په څېر ښاري مرکزونو کې خدمات تر ډېر فشار لاندې راغلي دي.
په راپور کې ويل شوي چې د دې مهاجرتونو د کچې او سرعت له امله، د خدماتو پراخ ګډوډي رامنځته شوې، په پناه ځایونو او غيررسمي استوګنځايونو کې بې کچه ګڼه ګوڼه رامنځته شوې، د خونديتوب خطرونه زيات شوي، د ناروغيو خپرېدو، او له ۸۰ سلنه زيات خلک چې د فقر کرښې لاندې ژوند کوي، له ټولنيزو شخړو سره مخ دي.
د سره صلیب او سرې میاشتې ټولنې نړیوال فدراسیون وايي چې د ايران څخه راستنېدونکي افغان مهاجر هم په زياتېدو دي. د دې ادارې په وينا، د ۲۰۲۵ کال د مارچ له ۲۰مې نېټې څخه تر اپريل ۳۰ پورې، ۱۷۰ زره او ۲۰۰ افغان مهاجر له ايران څخه ايستل شوي دي.
