د افغانستان د بیارغونې لپاره د امریکا د ځانګړي سرمفتش اداره (سیګار) په خپل راپور کې ویلي، اشرف غني او د هغه ملګرو د تېښتې په ورځ ارګ کې پنځه میلیونه ډالر پرېښي وو.
سیګار د د افغانستان د دولت دوو پخوانیو چارواکو په حواله ویلي، د ولسمشر د ساتنې ځانګړې امنیتي قطعې، د ارګ په مربوطاتو کې ۵ میلیونه ډالر وموندل.
دغو چارواکو سیګار ته ویلي، څو بیکونه (کڅوړې) چې دوی ته ویل شوي وو اسناد او کتابونه دي، د ښاغلي غني موټرو کې ځای پرځای شوي وو او له هغه سره د ارګ د هلیکوپټر د پرواز ساحې ته وړل شوي وو.
په دغه راپور کې راغلي:«د ملي امنیت سلاکار حمدالله محب له پرواز وروسته له دغو چارواکو پوښتلي چې ایا بیکونه هلیکوپټر کې ځایپرځای شوي که نه. کله یې چې واورېدل ځینو کسانو ته د ځای پیدا کېدو لپاره ځیني بیکونه غورځول شوي، وویل، اوه! ډېر بد شوي، بیکونو کې پیسې وې.»
د سیګار په تېر راپور کې هم ویل د پنځه میلیونه ډالرو ورکېدو ته اشاره شوې وه.
هغه راپور کې ویل شوي وو چې له ارګه د اشرف غني د تېښتې پرمهال، شک و چې شاوخوا ۵ میلیونه ډالر ارګ کې پرېښودل شوي وو اوددوی تر تېښتې وروسته د ارګ امنیتي محافظانو خپلو کې وېشلي دي.
د دغو تورونو په تړاو د ښاغلي محب نظر وغوښت، خو هعه که څه هم زموږ پیغام واورېد خو ځواب یې رانکړ.
د جمهوري دولت یوه پخواني چارواکي آمو ټلویزیون ته وویل، ارګ ډېرې اوپراتیفي پیسې وې او پنځه میلیونه یې په پرتله ډېرې کمې دي.
لوګر کې د جمهوري دولت وروستي والي عبدالقیوم رحیمي ددغو خبرو په تایید وایي چې باید ددغو پیسو او د جمهوریت په ټوله موده کېبهر ته د ویستل شویو پیسو په تړاو څېړنه وشي؛ په تېره بیا د وروستیو دوو کلونو.
رحیمي زیاتوي:«زه فکر کوم یوه محکمه باید جوړه شي او له ولسمشره نیولې تر ما پورې باید ټول راوغوښتل شي او د اسنادو له مخېباید ثابته شي چې چا چور کړی او چا افغانستان دې ورځې ته رسولی دی.»
په ورته وخت کې ځیني سیاسي کارپوهان وايي، ولسمشر اشرف غني چې د افغانستان مرکزي بانک له رییس سره یوځای تښتېدلی، د سیګار ځینې پوښتنې بې ځوابه پرېښې دي. کارپوهان ټینګار کوي چې غلا شوې پیسې تر هغه څه ډېرې دي چې روسي رسنیو یې د ښاغلي غني د تېښتې په لومړیو ورځو کز راپور ورکړ.
سیاسي کارپوه فرشید حکیمیار وايي، د مرکزي بانک ډېر حسابونه ناڅرګند پاتې دي. د امریکا د شتمنۍ وزارت له شمېرو سره ډېر لویتوپیر شتون لري.
هغه زیاته کړه:«ځینې معلومات چې ارګ ته نږدیو کسانو څخه زه لرم، د افغانستان مرکزي بانک او د امریکا شتمنۍ وزارت د حسابونو ترمنځ له ۲۰۰ تر ۳۰۰ میلیونه ډالر توپیر موجود دی.»
سیګار په دې راپور کې ویلي، اشرف غني د پیسو د غلا رښتینولۍ او ناسموالي په تړاو له څېړنې ځان څنډې ته کړی خو د هغه وکیل ددغې امریکايي ادارې له ۵۶ پوښتنو یوازې پنځو ته ځواب ویلي.
