طالبانو د پنجشېر زمرد څلور زره قيراطه په داوطلبۍ کې پر افغان سوداګرو وپلورل.
د طالبانو تر ادارې لاندې ملي ټلویزیون راپور ورکړ چې د زمرد ټول ارزښت ١٢٤زره ډالر و.
د دغه راپور پر بنسټ، د طالبانو له خوا پلورل شوي زمرد په پنجشير ولايت کې له څلورو کانونو څخه وېستل شوي وو.
دا په داسې حال کې ده، چې د هېواد يو شمېر اوسېدونکي د طالبانو له خوا د هېواد د کانونو په کېندنه او ليلام کې د روڼتيا پر نشتوالي نيوکه کوي او وايي چې دغه کانونه ملي پانګه ده او بايد د افغانانو په ګټه ترې کار واخستل شي.
له بلې خوا دغه هېوادوال د کانونو د داوطلبۍ پر بهير او په دغه ډول قراردادونو کې پر ښکېلو شرکتونو نيوکه کوي او وايي، چې طالبان تر ډېره د دغو کانونو قرارداد له هغو شرکتونو سره کوي، چې د دوى له کورنيو او يا يې د کورنيو له غړو سره تړاو لري.
هېوادوال وايي، چې د طالبانو له خوا د کانونو د کندنې بهير روڼ نه دى او دوی شک لري، چې له دې ادرسه راټولې شوې پيسې به د افغانانو په ګټه ونه لګول شي.
