په سویلي کوریا کې له سختو ورښتونو وروسته د سېلابونو او ځمکې د ښویېدو له امله د تلفاتو شمېر ۳۳ تنو ته رسېدلی دی.
د سویلي کوریا چارواکو ویلي چې د شنبې په ورځ یو شمېر موټر د چئونګجو ښار په یوه تونل کې چې تر اوبو لاندې و، بند پاتې دي.
مرستندویه ډلې د یکشنبې سهار مهال وتوانېدې چې نهه مړي له تونل څخه راوباسي.
ویل کېږي چې کابو ۱۵ موټر په دغه ښاري تونل کې بند پاتې دي.
د رپوټونو له مخې، په تېرو څو ورځو کې سخت ورښتونه د سېلابونو د راتلو او ځمکې د ښویېدو لامل شوي چې تراوسه یې ۳۳ تنه مړه کړي دي.
ددغه هېواد چارواکو څه د پاسه اوه زره او ۵۴۰ تنه نور امنو سیمو ته لېږدولي دي.
