طالبانو په تېره میاشت کې له ۷۰ زیات کسان په دورو وهلي دي، چې ښځې هم په کې شاملې دي. د طالبانو د سترې محکمې لهخوا د خپرو شویو راپورونو څخه د آمو موندنې ښیي چې د جولای له پیله د دې میاشتې تر پای پورې، طالبانو د هېواد په پنځلسو ولایتونو کې د ۱۲ ښځو په ګډون ۷۴ کسان په دورو وهلي دي.
د هیواد وګړي او د بشري حقونو یو شمیر فعالان، د طالبانو په سخت چلند په نیوکې سره، د خلکو په وړاندې د طالبانو لخوا د خلکو په دورو وهل د اسلامي اصولو خلاف او د بشري حقونو ښکاره سرغړونه ګڼي.
د هرې ورځې په تیریدو سره، د طالبانو لخوا د هیواد د وګړو د بدني سزا ساحه پراخېږي. د آمو موندنې ښیي چې طالبانو په تېره میاشت کې د خلکو په وړاندې د ښځو په ګډون له ۷۰ ډیر کسان په دُرو وهلي دي.
د طالبانو د سترې محکمې لخوا خپرې شوې شمېرې ښیې چې د جولای له لومړۍ نیټې څخه د دې میاشتې تر پای پورې د کابل په ګډون د هیواد په ۱۵ ولایتونو کې د طالبانو لخوا ۷۴ کسان په دُرو وهل شوي دي.
په تېره یوه میاشت کې د دُرو وهلو شمېرې
• ۷۴ کسان په دُرو وهل شوي
• ۱۲ ښځې پکې شاملې دي
• د کابل په ګډون په ۱۵ ولایتونو کې
• د نامشروع اړیکو، له کوره د تیښتې، غلا او اخلاقي فساد په تور
کابل، سرپل، بدخشان، پروان، جوزجان او پکتیا ولایتونه د هغو ولایتونو له ډلې څخه دي چې په تیره میاشت کې یې تر ټولو زیات د دُرو وهل شاهدان وو.
په ولایتونو کې د دورو وهلو شمېرې
کابل – د دُرو وهلو ۱۹ قضیې
سرپل – د دُرو وهلو ۱۹ قضیې
بدخشان – د دُرو وهلو ۸ قضیې
پروان – د دُرو وهلو ۶ قضیې
جوزجان – د دُرو وهلو ۶ قضیې
پکتیا – د دُروهلو ۵ قضیې
د هېواد اوسیدونکي د طالبانو پر سخت چلند په نیوکې سره ټینګار کوي چې د ټولو په وړاندې په دُرو وهل د انساني ارزښتونو خلاف او غیر عادلانه عمل دی.
په همدې حال کې، د بشري حقونو ځینې فعالان د طالبانو لخوا بدني سزا د بشري حقونو ښکاره سرغړونه ګڼي او ټینګار کوي چې طالبانو د شریعت قانون د خلکو د ځپلو او واک ساتلو لپاره په یوه وسیله بدل کړی دی.
د آمو موندنې ښيي چې طالبانو په تیرو څلورو کلونو کې د خلکو په وړاندې له ۱۱۴۵ څخه ډیر کسان په دُرو وهلي دي، چې ۱۹۰ ښځې هم پکې شاملې دي.
که څه هم د ملګرو ملتونو، د بخښنې نړیوال سازمان، د بشري حقونو څار سازمان او نورو نړیوالو سازمانونو په ګډون، په دوامداره ډول له طالبانو غوښتني چې د هیواد د وګړو بدني سزا لغوه کړي؛ خو په عمل کې، لیدل کېږي چې طالبان د دې غوښتنو له پامه غورځولو سره، په هیواد کې د خپل تفسیر شوي شریعت او تاوتریخوالي په پلي کولو سره خپلو کړنو ته دوام ورکوي.
په دې وروستيو کې، د جرمونو نړیوالې محکمې په یوه بې ساري اقدام کې، د طالبانو د مشر هبت الله اخندزاده او د طالبانو د سترې محکمې د رئیس عبدالحکیم حقاني د نیولو امر صادر کړ، چې د بشريت ضد جنایتونو، په ځانګړې توګه د جنسیت پر بنسټ ځورونې، په جرمونو تورن شوي دي.
