د طالبانو د امربالمعروف محتسبينو نن (سه شنبه، ۸ لړم) په کابل کې پنځه نارینه او دوه ښځې د «اخلاقي فساد» په تور ونیول.
د طالبانو د امربالمعروف وزارت په خبرپاڼه کې راغلي، چې دغه کسان د کابل ښار له ۲۲مې ناحیې څخه نیول شوي او تر څېړنو وروسته یې اړوندو ادارو ته سپارلي دي.
دا په داسې حال کې ده، چې طالبانو تر دې مخکې هم په کابل کې ښځې او نجونې د«نامناسبه حجاب او له واده پرته اړيکو» په تور نیولي دي.
د افغانستان لپاره د ملګرو ملتونو ځانګړي راپور ورکوونکي ریچارډ بینټ په خپل نوي راپور کې ویلي، چې د کره معلوماتو له مخې د طالبانو له خوا نیول شوې ښځې نه یوازې دا چې ځورول شوې، بلکې په ځینو مواردو کې پرې«جنسي تېري» هم شوي دي.
ښاغلي بینټ ټینګار وکړ چې د دې تاوتریخوالي اسناد ښیې چې ښځې د «نامناسب» حجاب اغوستلو له امله د طالبانو توقیف ځایونو ته وړل شوي، چیرې چې هلته “لفظي سپکاوي” او «جنسي ځورونې» سره مخ شوي دي.
هغه د طالبانو تر واک لاندې افغانستان کې د ښځو وضعیت د «جنسيتي تبعيض» یوه بېلګه وبلله او ویلي يې دي چې دا اصطلاح د طالبانو بنسټیز او ایډیالوژیکي ماهیت په ښه توګه څرګندوي.
