د کابل د امنیې قومندانۍ لپاره د طالبانو ویاند خالد ځدراڼ وايي، پرون چهارشنبه د لړم دویمه د کابل په سينما پامیر کې د چاودنې له امله یو ماشوم وژل شوی او څو نور ټپیان شوي دي.
طالبانو د دې پېښې د ټپيانو د شمېر په اړه څه نه دي ويلي، خو په کابل کې د ايمرجنسي روغتون مسوولين وايي، چې له دې چاودنې وروسته د ماشومانو په ګډون ١١ ټپيان دغه روغتون ته لېږدول شوي دي.
ښاغلي ځدراڼ ويلي، چې د دې چاودنې عامل د طالبانو له لوري د چاودېدونکو توکو د لېږد پر مهال نیول شوی دی.
د دغه کس د هويت په اړه څه نه دي ويل شوي.
د ایمرجنسي روغتون د معلوماتو له مخې، دغه چاودنه د چهارشنبې په ورځ د لړم په دويمه د سينما پامیر د نیلام بازار د ګڼې ګوڼې په یوه برخه کې شوې ده.
د دغه روغتون مشر مخکې ویلي وو چې د یوه ټپي روغتیايي حالت نازک دی.
د افغانستان پخواني ولسمشر حامد کرزي په یوه خبرپاڼه کې دا پېښه غندلې او هغه یې «ترهګريزه» بللې ده.
تر اوسه کومې ډلې د دې چاودنې مسوولیت پر غاړه نه دی اخیستی.
