ورزش

د افغانستان فوټسال لوبډلې ګواتیمالا ته ۵ پر۴ ماتې ورکړه

د افغانستان د فوټسال ملي لوبډلې د دوشنبې په ورځ په تایلنډ کې د کانټینینټل فوټسال سیالیو په لومړۍ لوبه کې ګواتیمالا ته ۵ پر ۴ ماتې ورکړه.

دغه سیالۍ د تایلنډ په پلازمېنه بنکاک کې ترسره شوې.

لومړۍ نیمايي ۱پر ۱ مساوي پای ته ورسېده، خو په دویمه نیمايي کې افغانستان ۵ پر ۴ بریا خپله کړه.

د افغانستان د فوټسال ملي لوبډله په ازبکستان کې د ۲۰۲۴ کال د فوټسال نړیوال جام ته د چمتووالي په موخه په دغو سیالیو کې ګډون کوي.

د مهال وېش له مخې به د افغانستان د فوټسال لوبډله سبا (سه شنبه) له کویټ، د چهارشنبې په ورځ له اسټرالیا او د جمعې په ورځ له تایلنډ سره لوبه وکړي.