چارواکي وايي، د جمو او کشمیر په همالیه سیمه کې د هندي سرتېرو پر کاروان د وسله والو په برید کې لږترلږه پنځه هندي پوځیان وژل شوي دي.
چارواکو د سه شنبې په ورځ تأیید کړه، چې په دې برید کې ۵ سرتېری وژل شوي او څو نور ټپیان دي.
تر اوسه کومې ډلې د دغه برید مسوولیت نه دی منلی.
هند او پاکستان دواړه د کشمیر پر همالیايي سیمه دعوه لري خو بېلابېلې برخې يې د دوى لخوا کنټرولېږي.
د هند په خاوره کې د هندو اکثریت جمو سیمه او د مسلمان اکثریت کشمیر دره شامله ده.
یوه میاشت وړاندې د جمو په سیمه کې د وسله والو په بریدونو کې ۱۲ تنه ووژل شول او لسګونه نور ټپیان شول.
