د اندونیزیا حکومت له افغانستان سره د ۱.۰۴ میلیونه ډالرو په ارزښت ۱۰ قلمه توکو مرسته وکړه.
اندونیزیايي رسنیو راپور ورکړی چې د مرستې کڅوړه کې خواړه، درمل او طبي کټونه شامل دي.
د راپورونو له مخې دغه مرستې به په هېواد کې د طبیعي پېښو پر زیانمنو شویو کورنیو وویشل شي.
د اندونيزيا رسنيو د ولسمشر په حواله ويلي، چې د دغه مرستو موخه په افغانستان کې د طبيعي پېښو د قربانيانو د ظرفيت لوړول دي؛ ترڅو وکولای شي په خپلو پښو ودرېږي.
د اندونیزیا ولسمشر جوکو ویدودو ددې مرستو په لېږلو هیله ښودلې چې دا بشري مرستې به په افغانستان کې د طبیعي پېښو له قربانیانو سره د بوج په کمولو کې مرسته وکړي.
دا په داسې حال کې ده، چې په هېواد کې وروستیو طبیعي پېښو سلګونه کسانو ته مرګ – ژوبله اړولې او په ځپل شویو سیمو کې یې پراخ مالي زیانونه اړولي دي.
