په یوه ورځ کې څه باندې ۱۴۰ افغان کډوالې کورنۍ له پاکستان او ایران څخه ویستل شوې او هېواد ته راستنې شوې دي.
د طالبانو تر ادارې لاندې باختر آژانس خبر ورکړ چې په تېره يوه ورځ (شنبه د غبرګولي په ٦مه) له پاکستان او ايران څخه ١٣٨ کډوالې کورنۍ په «په خپله خوښه او جبري ډول» ويستل شوې دي.
د دغه راپور پر بنسټ، دغه کډوال د ننګرهار او نیمروز ولایتونو له لارو هېواد ته داخل شوي دي.
باختر آژانس ليکلي دي چې څلوېښت کورنۍ د تورخم او ٧٢ کورنۍ د سپين بولدک له لارې افغانستان ته داخلې شوې دي.
په همدې حال کې د دغه راپور له مخې، ۲۶ نورې کورنۍ د نیمروز ولایت د پل ابرېشم له لارې هېواد ته داخلې شوې دي.
دا په داسې حال کې ده، چې پاکستان او ایران یوه ورځ وړاندې (جمعه د غبرګولي په پنځمه) هم شاوخوا ۱۵۰ افغان کډوال په خپله خوښه او په زوره ویستلي وو.
