پاکستاني رسنیو یو ویډیويي ټیپ خپور کړی چې دا ټیپ په رسنیو کی هم خپور شوی او ویلي یې دي چې د دې ویډیو ټیپ پر بنسټ د طالبانو یوه قوماندان د پاکستانی طالبانو دتحريک یوې څانګې (حافظ ګل بهادر) سره اړيکه لري او ورته لارښوونه کوئ چی څنګه پر پاکستاني پوځیانو برید وکړي.
د جيو نيوز د راپور له مخې، د دي ويډيو ټيپ په حواله، د «يحيى»په نوم د طالبانو دغه قوماندان د ډيورنډ کرښې په اوږدو کې پر پاکستاني پوځيانو د بريدونو په اړه ياغيانو ته لارښوونه کوي.
جیونیوز د پاکستان د امنیتي ځواکونو له قوله هم ویلي، چې دا ټیپ د افغانستان په «ډنګر ایلګاد» سیمه کې ثبت شوی دی.
د دې راپورونو پر بنسټ، په دې ټیپ کې یحیی د ټي ټي پي یاغیانو ته د برید پلان تشریح کوي.
د پاکستاني رسنیو د راپورونو له مخې، یحیی په دي ټیپ کې د طالبانو د مشر هبت الله آخندزاده نوم د «امیر المومنین» په توګه یاد کړی دی.
طالبانو تر اوسه په دې اړه څه نه دي ویلي.
دا په داسې حال کې ده چې تېره اوونۍ پاکستان د افغانستان پر ځينو سيمو هوايي بريدونه وکړل. طالبانو ویلي دي چې په خوست او پکتیکا کې په دغو بریدونو کې اته تنه ملکي وګړي وژل شوي دي
