د پاکستان د بهرنیو چارو د وزارت ویانده ممتاز بلوچ وايي، د افغانستان پر ځینو برخو د پاکستاني پوځیانو وروستي بریدونه د یاغیانو پر ضد کار دی، نه په افغانستان کې د ملکي وګړو پر وړاندې.
طالبانو ویلي دي چې، په دغو بریدونو کې لږ تر لږه ۸ تنه ملکي وګړي وژل شوي دي.
د پاکستان د بهرنیو چارو وزارت ویانده وايي، د دې بریدونو موخه د «تحریک طالبان پاکستان» له متحدینو څخه د حافظ ګل بهادر د ډلې یاغیان وو.
نوموړې په یوه خبري غونډه کې وویل چې، د پاکستان د بهرنیو چارو وزیر د طالبانو د بهرنیو چارو له وزیر سره د دې بریدونو د وروسته پېښ شویو موضوعاتو په اړه خپلې اندیښنې شریکې کړې دي.
دې د دې بريدونو په اړه نور جزئيات وړاندې نه کړل.
هغې زیاته کړه: «پاکستان څو ځلې افغانستان ته د ترهګرو د پناه ځایونو په اړه معلومات ورکړي دي او د تحریک طالبان پاکستان پټنځایونه په افغانستان کې شتون لري.
هغې ادعا وکړه چې؛ پاکستان له افغانستانه غوښتي چې له ترهګرۍ سره د مبارزې لپاره ګډه تګلاره جوړه کړي او د دغو ستونزو د هواري غوښتنه يې کړې ده.
مېرمن بلوچ وویل: «پاکستان له افغانستان سره ښې اړیکې غواړي.»
تېره دوشنبه پاکستاني پوځیانو د خوست او پکتیکا ځینې سیمې په نښه کړې.
دا بریدونه د ډیورنډ کرښې په اوږدو کې د طالبانو او پاکستاني پوځیانو ترمنځ د سرحدي تاو تریخوالي لامل شوي دي.
