په کابل کې د روسیې سفارت په یوه اعلامیه کې ویلي چې روسي پلاوی به په هغه ناسته کې ګډون ونه کړي چې د افغانستان د مدني ټولنې د استازو او د افغانستان لپاره د هېوادونو د ځانګړو استازو ترمنځ په دوحه ترسره کېږي.
په اعلامیه کې ادعا شوې چې د مدني ټولنې د استازو غوره کول «په غیرشفاف» ډول شوي دي.
دغه سفارت ویلي چې طالبانو هم د «مننې او ستاینې» په څرګندولو د دوی تصمیم منلی دی.
د روسیې سفارت ټینګار کړی چې مسکو د دوحې په غونډه کې د ګډون نه کولو په اړه د طالبانو پرېکړه «منطقي» بولي.
په اعلامیه کې راغلي، د طالبانو استازو ته وړاندیز وشو چې یوازې د ناستو په فرعي برخو کې ګډون وکړي او د دوحې ناستې پلانوونکو د «ټول افغانستان» په استازیتوب د ګډون په هکله د طالبانو غوښتنو ته بې پامي وکړه.
