د کولمبیا چارواکو اعلان کړی، په یوه غرنۍ سیمه کې چې کویبدو او مدلین ښارونه سره نښلوي د غره د ښوېيدو له امله، ۳۴ تنه مړه شوي او لسګونه نور ټپیان دي.
د کولمبیا د بیړنیو حالاتو ملي ادارې پر ایکس ویلي چې تراوسه ۱۷ مړي پېژندل شوي او د ۱۷ نورو د هویت د معلومولو لپاره هڅې روانې دي.
له دې مخکې ددغه هېواد چارواکو ددغې پېښې د مړو شمېر ۱۸ او د ټپیانو ۳۵ تنه اعلان کړی و.
کولمبیايي چارواکو ویلي چې دا پېښه له سخت ورښت وروسته شوې ده.
د دغه هېواد ځایی چارواکو اعلان کړی چې د ژغورنې ډلې سیمې ته لېږل شوې او ډېری وګړي لا هم تر خاورو لاندې دي.
له بلې خوا، د کولمبیا د ولسمشر مرستیال هم پر ایکس د یوه پيغام په خپرولو ویلي چې دولت وضعیت له نږدې څاري.
ویل کېږي چې په دې پېښه کې د قربانیانو شمېر د زیاتوالي احتمال شته.
