یو شمېر متقاعدین وایي له تېرو دوو کلونو راهیسې یې حقونه نه دي تر لاسه کړي او زیاتوي چې له ګڼو اقتصادي ستونزو سره لاس او ګرېوان دي.
دوی وايي، چې د طالبانو له واکمنېدو وروسته يې څو ځلې د خپلو حقونو غوښتنه کړې، خو تر اوسه يې په ترلاسه کولو نه دي بریالي شوي.
د طالبانو له دویم ځلې واکمنۍ وروسته متقاعدین وايي، چې حقونه یې نه دي ترلاسه کړي او له ګڼو اقتصادي ننګونو سره مخ دي.
د فراه اوسېدونکې ۶۳ کلنه شفيقه چې له ۴۰ کلونو راهيسې يې په فراه او هرات کې د ښوونکې په توګه دنده ترسره کړې، وايي د ځوانۍ تر پايه يې د هېواد پوهنې ته خدمت کړى، خو تر تقاعد وروسته له دوو کالو راهیسې یې خپل حق نه دی ترلاسه کړى او اقتصادي ستونزو یې ژوند ستونزمن کړی ده.
د شفيقې په څېر په سلګونو نور متقاعدين هم د تنخواه له نه ورکولو شکایت کوي او وايي چې د پرلهپسې غوښتنو سربېره طالبانو د دوى غوښتنو ته پام نه دى کړى.
که څه هم له څه باندې یو کال راهیسې د طالبانو د مالیې وزارت له خوا د تقاعد شویو د حقونو د ورکړې طرح جوړه شوې، خو د طالبانو مشر لا نه ده تأیید کړې.
ویل کېږي چې اوسمهال په افغانستان کې څه باندې ۲۰۰ زره متقاعدین شته چې واک ته د طالبانو له راتګ راهیسې یې د ډېرو اعتراضونو سربېره معاشونه نه دي ترلاسه کړي.
طالبانو ونه غوښتل په دې اړه کوم ځواب ورکړي.
