په جینوا کې د ملګروملتونو د بشري حقونو په شورا کې، ددغې شورا ۵۳مه ناسته د افغان ښځو او نجونو په وړاندې د توپیري چلند په هکله جوړه شوې او ټول په یوه آواز له افغان مېرمنو د ملاتړ غږ پورته کړ او له طالبانو یې وغوښتل چې بشري حقونو په تېره بیا د ښځو حقونو ته درناوی وکړي او له تاوتریخوالي او همداراز د ښځو خلاف سیاستونو څخه لاس واخلي.
د ملګروملتونو سازمان د غړو هېوادونو د استازو دا څرګندونې په داسې حال کې کېږي چې د ملګروملتونو د بشري حقونو ځانګړي راپور ورکوونکي ریچاد بنت، په افغانستان کې د بشري حقونو د وضعیت په تېره بیا ښځو د حقونو په اړه د خپل راپور تازه جزییات وړاندې کړل.
ښاغلی بنت د افغان مېرمنو د محرومیت په وړاندې د مبارزې لپاره د عملي ګامونو پورته کولو غوښتونکی دی.
د افغانستان په چارو کې د امریکا ځانګړې استازې رینا امیري هم وویل چې په افغانستان کې د ښځو حقونه د امریکا ستراتیژیک لومړیتوب دی او د ښځو په وړاندې یې د طالبانو پر توپیري سیاستونو نیوکه وکړه.
د معترضو مېرمنو استازې همې له نړیوالې ټولنې غواړي چې باید د ښځو په وړاندې د طالبانو د کړنو په اړه د فرمانونو په صادرولو بسنه ونه کړي.
د هغو ننګونو په وړاندې د نړیوالې ټولنې مسوولیت منل چې اوسمهال افغان مېرمنې هغه زغمي، د دې ناستې یوه مهمه غوښتنه وه.
په دغه ناسته کې یونیسف یا له ماشومانو د ملاتړ صندوق هم له طالبانو غواړي د نجونو پرمخ د ښوونځیو دروازې پرانیزي.
د هغو هېوادونو په استازو کې چې په دې ناسته کې یې د ښځو په وړاندې د طالبانو پر سیاستونو سختې نیوکې وکړې، د قطر، ایران او پاکستان استازو هم د افغان مېرمنو په ملاتړ غږ پورته کړ.
په دې ناسته کې د ایران استازی وايي: «ایران په پرلپسې توګه د ټولګډونه حکومت د جوړېدو پر اړتیا ټینګار کړی او د ښځو په ګډون افغانان په سوله ییزه فضا کې د ژوند مستحق دي.»
دا راپور چې د روان کال په مې میاشت کې د ۵۱ ښځو په ګډون له ۷۹ تنو سره د مرکو او یوې سروې پر بنسټ چمتو شوی، په هغه وخت کې له دوه زره او ۱۱۲ تنو سره د افغانستان په اتلسو ولایتونو کې خبرې شوې دي.
که څه هم طالبانو تراوسه ددې راپور په وړاندې غبرګون نه دی ښودلی، خو له دې مخکې یې په ځلونو ویلي چې د اسلامي شریعت پر بنسټ د ښځو د حقونو عملي کولو ته ژمن دي.
