د ملګرو ملتونو سازمان د اټکلونو له مخې، هند به د اپرېل میاشتې د وروستیو ۱۵ ورځو په لړ کې د نړۍ پر ترټولو زیات نفوسلرونکي هېواد بدل شي.
د ملګرو ملتونو سازمان اټکل کړی چې په دې میاشت کې به د یاد هېواد شمېر تر څه د پاسه ۱.۴ میلیارد تنو ورسېږي.
د هند د سرشمېرنو له مخې، په ۲۰۱۱ کال کې د دغه هېواد د وګړو شمېر ۱.۲۱ میلیارد تنه و. دا ښيي چې هند په تېرو ۱۲ کلونو کې ۲۱۰ میلیون تنه یا نږدې د برازیل هېواد په کچه نفوس زیات کړی دی.
رویټرز د ۲۰۱۹ تر ۲۰۲۱ کلونو د رسمي معلوماتو پربنسټ راپور ورکړی چې هند توانېدلی له ۲.۰۵ څخه تر ۲ کمې کچې ته د زېږونونو د شمېر په کمولو د خپل نفوس وده کنټرول کړي.
اخوا د چین د سرشمېرنې ملي ادارې اعلان کړی چې د چین نفوس د ۲۰۲۲ کال تر پایه کابو ۸۵۰ زره تنو ته کم شوی او تر یو میلیارد او ۴۰۰ میلیون تنو رسېدلي دي. دغه کمښت په ۱۹۶۱ کال کې د چین له قحطۍ راهیسې ترټولو زیات کمښت ښيي.
د زېږونونو کچه په تېر کال کې له هرو ۱۰۰۰ ښځو ۶.۷۷ زېږونونو وو چې د ۲۰۲۱ کال په پرته ۷.۵۲ زېږونه کمښت یې لرلی او د زېږون ترټولو ټیټه کچه یې ثبت کړې ده.
په همدې حال کې چین له ۱۹۷۴ کال راهیسې د مړینې ترټولو لوړه کچه ثبت کړې ده. د معلوماتو له مخې، له هرو ۱۰۰۰ کسانو د ۷.۳۷ مړینې ثبت شوې چې په ۲۰۲۱ کال کې دغه شمېر ۷.۱۸ پېښې وې.
په دې لړ کې د هند د نفوسو زیاتېدل په راتلونکو کلونو کې د کار د ځواک لپاره ننګونې رامنځته کوي.
تمه کېږي په راتلونکو کلونو کې ډېری خلک له کلیو د دغه هېواد لویو ښارونو ته کډوال شي چې د ښاري نفوس د چټک زیاتوالی لامل به هم وګرځي. د دغه شمېر وګړو لپاره د لومړنیو، روغتیایي او ټولنیزو خدماتو برابرول هم کولای شي د هندي سیاست جوړونکو لپاره ننګونې جوړې کړي.
له هند او چین وروسته امریکا، اندونیزیا، پاکستان، نایجریا او بنګلهدېش په ترتیب سره د نړۍ په هېوادونو کې ترټولو زیات نفوس لرونکي دي.
